Border News Agency
မင်းတပ်၊ ဇူလိုင် ၂။
ချင်းပြည်တောင်ပိုင်း၊ မင်းတပ်နဲ့ ကန်ပက်လက်မြို့နယ်တွေထဲကို အင်အားထောင်ချီနဲ့ စစ်ကြောင်းထိုးလာတဲ့ အာဏာသိမ်းစစ်တပ်တွေကို ချင်းပြည်သူ့တပ်မတော် (CPA) နဲ့ မဟာမိတ်ပူးပေါင်းတပ်တွေက တလကျော်ကြာခုခံတိုက်ခိုက်နေပြီး စစ်ရေးအရအသာစီးရနေတယ်လို့ ဇူလိုင်လ ၂ ရက်၊ ဒီနေ့မှာထုတ်ပြန်ပါတယ်။
ပြီးခဲ့တဲ့ မေလ ၁၆ ရက်နေ့ကစတင်ခဲ့တဲ့ ဒီတိုက်ပွဲတွေအတွင်း အာဏာသိမ်းစစ်တပ်ဘက်က ရာနဲ့ချီသေဆုံးဒဏ်ရာရပြီး စစ်ကြောင်းပျက်ခဲ့သလို ရန်သူ့အလောင်းတွေ၊ သုံ့ပန်းတွေနဲ့အတူ လက်နက်ခဲယမ်းအများအပြားကိုပါသိမ်းဆည်းရမိခဲ့တယ်လို့ ဆိုပါတယ်။
အဲဒီတိုက်ပွဲတွေကို CPA နဲ့အတူ ယောဒေသကတော်လှန်ရေးတပ်ဖွဲ့တွေဖြစ်တဲ့ YDF၊ YA အပါအဝင် မဟာမိတ်ပူးပေါင်းတပ်တွေက လက်တွဲပြီး ဟန့်တားတိုက်ခိုက်ခဲ့ကြတာဖြစ်ပါတယ်။
မြေပြင်မှာ အထိနာနေတဲ့အာဏာသိမ်းစစ်တပ်ဟာ အရပ်ဖက်ပစ်မှတ်တွေကို လေကြောင်း၊ ဒရုန်းနဲ့ လက်နက်ကြီးတွေသုံးပြီး နေ့စဉ်ရက်ဆက်ပစ်ခတ်နေတာကြောင့် နေအိမ်တွေနဲ့ဘာသာရေးအဆောက်အအုံတွေ ပျက်စီးခဲ့ရပါတယ်။
အဲဒီအပြင် အမျိုးသမီးနဲ့ကလေးသူငယ်တွေအပါအဝင် အပြစ်မဲ့အရပ်သားပြည်သူတွေလည်း ထိခိုက်သေဆုံးမှုတွေရှိနေပြီး၊ ချင်းပြည်သူ့တပ်မတော် (CPA) အနေနဲ့ အာဏာသိမ်းစစ်တပ်ကို အရှိန်အဟုန်မြှင့်ပြီး အဆုံးထိဆက်လက်တိုက်ပွဲဝင်သွားမယ်လို့လည်း ဆိုပါတယ်။
