Border News Agency
မြောက်ဦး၊ ဩဂုတ် ၂၂။
အာရက္ခပြည်သူ့အစိုးရ၊ဗဟိုအုပ်ချုပ်ရေးဌာနအောက်မှာရှိတဲ့ စိုက်ပျိုးရေးနဲ့ မွေးမြူရေးဌာန၊မြေယာကျွမ်းကျင် ခရိုင်/မြို့နယ် အုပ်ချုပ်ရေးဌာနခွဲမှာ လစ်လပ်နေတဲ့ဒုတိယဦးစီးအရာရှိနဲ့ မြေယာကျွမ်းကျင်ရာထူးတွေအတွက် ဝန်ထမ်းတွေခေါ်ယူနေတယ်လို့ အာရက္ခပြည်သူ့ဝန်ထမ်းရွေးချယ်ခန့်အပ်ရေးကော်မရှင် (APSC) က သြဂုတ်လ ၂၂ ရက်၊ဒီနေ့ထုတ်ပြန်ပါတယ်။
အဲဒီစိုက်ပျိုးရေးနဲ့ မွေးမြူရေးဌာန (ဗဟိုရုံး) အတွက် ဒုတိယဦးစီးအရာရှိတနေရာ၊နည်းပညာဌာနခွဲအတွက်ငါးနေရာ၊ AAI-သင်ကြားရေး လက်ထောက်ကထိကတနေရာနဲ့ မြေယာကျွမ်းကျင် ခရိုင်/မြို့နယ် အုပ်ချုပ်ရေးဌာနခွဲအတွက်နှစ်ဆယ့်ခုနှစ်နေရာဖြစ်ပြီး စုစုပေါင်းရာထူးသုံးဆယ့်လေးနေရာခေါ်ယူထားတာပါ။
လျှောက်ထားလိုသူတွေအနေနဲ့ ဒုတိယဦးစီးအရာရှိရာထူးအတွက် အသက်ဆယ့်ရှစ်နှစ်ကနေ လေးဆယ်အထိ၊မြေယာကျွမ်းကျင် ရာထူးအတွက်အသက်နှစ်ဆယ့်သုံးနှစ်ကနေ သုံးဆယ်ငါးနှစ်အထိလျှောက်ထားနိုင်ကြပြီး ရွေးချယ်ခံရရင်တော့ အနည်းဆုံးသုံးနှစ်တာဝန်ထမ်းဆောင်ရမှာဖြစ်ပါတယ်။
အဲဒီလျှောက်လွှာတွေကို စက်တင်ဘာလ ၁၁ ရက်နောက်ဆုံးထားပြီး APSC ဖွဲ့ရဲ့ Telegram Account (@APSOffice) သို့ ပေးပို့လျှောက်ထားကြရမှာဖြစ်သလို လျှောက်လွှာပုံစံတွေကိုလည်း ဗဟိုအုပ်ချုပ်ရေးဌာနအောက်ရှိ သက်ဆိုင်ရာမြို့နယ်/တိုက်နယ်ရုံးတွေမှာ ထုတ်ယူနိုင်တယ်လို့ဆိုပါတယ်။
ရေးဖြေစာမေးပွဲကိုတော့ စက်တင်ဘာလ ၁၈ ရက်နေ့မှာ အင်္ဂလိပ်စာနဲ့ သုတရသဘာသာရပ်နှစ်ခုကို APSC ရုံးမှာ ဖြေဆိုကြရမှာဖြစ်ပြီး ရေးဖြေအောင်မြင်သူတွေရဲ့ စာရင်းကို စက်တင်ဘာလ ၁၉ ရက်နေ့မှာ ထုတ်ပြန်ကြေညာပေးသွားမှာ ဖြစ်ပါတယ်။
အဲဒီရေးဖြေအောင်မြင်သူတွေကို စက်တင်ဘာ ၂၁ ရက်နဲ့ ၂၂ ရက်နေ့တွေမှာ လူတွေ့နှုတ်မေးစာမေးပွဲ စစ်ဆေးသွားမှာဖြစ်ပြီး အသေးစိတ်သိရှိလိုရင် APSC ရဲ့ Telegram မှတဆင့် ဆက်သွယ်မေးမြန်းနိုင်တယ်လို့ဆိုပါတယ်။
