Border News Agency
ဘန်ကောက်၊ဩဂုတ် ၂၉။
ထိုင်းနိုင်ငံ၊ ဘန်ကောက်မြို့ရှိ ကလောင်ထုံစင်တာမှာ ဩဂုတ် လ၂၈ ရက်၊ညပိုင်းကစတင်ဖြစ်ပွားခဲ့တဲ့ မီးလောင်မှုဟာ ဒီနေ့မနက်ပိုင်းမှာ ထပ်မံတောက်လောင်ခဲ့တာကြောင့် မီးသတ်တပ်ဖွဲ့ဝင်တွေက အရေးပေါ် ထိန်းချုပ်ငြှိမ်းသတ်ခဲ့ရပါတယ်။
အဲဒီမီးလောင်မှုအတွင်း မီးခိုးငွေ့တွေပျံ့နှံ့ခဲ့ပေမယ့် ကျန်းမာရေးကိုထိခိုက်စေတဲ့ အန္တရာယ်အဆင့်မရှိသေးဘူးလို့ ဘန်ကောက်မြို့တော် အုပ်ချုပ်ရေးအဖွဲ့က အတည်ပြုထားပါတယ်။
မီးလောင်မှုနဲ့အတူ အဆောက်အအုံအတွင်း လောင်စာပစ္စည်းတွေများပြားတာကြောင့် အချို့နေရာတွေပြိုကျပျက်စီးခဲ့ပြီး အနီးနားရှိ အဆောက်အအုံတွေဆီ မီးမကူးစက်အောင်တားဆီးနိုင်ခဲ့ပါတယ်။
ဒီဖြစ်စဉ်အတွင်း မီးသတ်စေတနာ့ဝန်ထမ်း ၁၁ ဦး ထိခိုက်ဒဏ်ရာရရှိခဲ့ပြီး အရေးပေါ် လူနာတင်ယာဉ်တွေနဲ့ ဆေးရုံကိုပို့ဆောင်ကုသပေးထားရပါတယ်။
ခုလက်ရှိမှာ သက်ဆိုင်ရာတာဝန်ရှိသူတွေနဲ့ ကယ်ဆယ်ရေးအဖွဲ့တွေက ထိခိုက်ပျက်စီးမှုအခြေအနေတွေကို ဆက်လက်စစ်ဆေးနေဆဲဖြစ်ပါတယ်။
