အင်တာဗျူး
Border News Agency
မြောက်ဦး၊စက်တင်ဘာ ၄။
အာရက္ခတပ်တော်(AA)ထိန်းချုပ်ထားတဲ့ ကျောက်တော်မြို့နယ်ထဲက ဒီလပ်တပ်ဖွဲ့ဝင်ခုနှစ်ဦးအပါအဝင်မူးယစ်ဆေးဝါးသုံးစွဲမှုရောင်းဝယ်ဖောက်ကားမှုတွေနဲ့အမျိုးသား၊အမျိုးသမီးခုနှစ်ဆယ်ခုနှစ်ဦးကို ဇူလိုင်လကရက္ခိုင်အမျိုးသားအဖွဲ့ချုပ်/အာရက္ခတပ်တော်(ULA/AA)ဖမ်းဆီးခဲ့ပါတယ်။
အဲဒီအထဲကကျောင်းသားလူငယ်တဆယ့်ကိုးဦးကို သြဂုတ်လ ၁၁ ရက်နေ့မှာမိသားစုတွေဆီ တရားဝင်ပြန်အပ်ပေးခဲ့သလို နောက်ထပ်ပြန်လွှတ်ပေးတာတွေလည်းရှိပါတယ်။
ဒါပေမယ့် ကျန်တဆယ့်ခုနှစ်ဦးကိုတော့ပြန်မလွှတ်ပေးသေးသလို မိသားစုဝင်တွေအဆက်အသွယ်မရကြတာမို့ စက် တင်ဘာလ ၃ ရက်၊မနေ့က မိသားစုဝင်တွေ သတင်းစာရှင်းလင်းပွဲလုပ်ခဲ့ကြပါတယ်။
အဲဒီအထဲကမိသားစုဝင်တဦးရှင်းပြတာကို Border News Agency ကို ဖော်ပြလိုက်ပါတယ်။
“ကျမအကိုနာမည်က မောင်မောင်ချေပါ။ ကျမတို့မောင်နှမနှစ်ယောက်အိမ်မှာ စကားပြောနေတဲ့အချိန် အိမ်ရှေ့ကိုကားနဲ့လာပြီးခေါ်တင်ပါတယ်။ ဒါကိုသူက ကျနော့်မှာ ဘာအပြစ်ရှိလည်းမေးတော့ ကျမမောင်လေးကို ကားထက်ကိုတက်ရင်တက် မတက်ရင်သေနတ်ဘောင်နဲ့ထုမယ်လို့ပြောပါတယ်။ ကျမကလည်း မောင်မောင်ချတက်တက်ဆိုပြီးတင်ပေးလိုက်ပါတယ်။”
“အဲဒီနေ့ညမှာ ရဲစခန်းကိုရောက်တော့ သူ့အဝတ်အစားတွေကိုသွားပြီးပို့ပေးခဲ့ပါတယ်။ တရက်နှစ်ရက်တော့ သူ့ကိုရဲစခန်းမှာတွေ့ခွင့်ရလိုက်ပါတယ်။ သူနဲ့တွေ့ရတာတော့ မဟုတ်ပါဘူး။ တဆင့်ခံသူ့ကို အဝတ်အစားပေးလိုက်ရတာပါ။”
“နောက်ပိုင်းသူတို့ဘက်ကနေရာပြောင်းလိုက်ပါတယ်။ ဌာနတခုကိုရောက်သွားပြီး အစားအစာသွားပို့တဲ့အချိန်မှာ သူတို့ကလက်မခံပါဘူး။ သူတို့ကိုကျောင်းသားတွေကိုလွတ်ပေးတဲ့အဖြတ်မှာ ပါမယ်လို့ပြောပါတယ်။ လွတ်လာတဲ့အထဲမှာ မပါပါဘူး။ ရဲစခန်းဘက်ကိုရောက်တဲ့အထဲမှာလည်း တခြားလူတွေသာပါတယ်။”
“ဒီတဆယ့်ခုနှစ်ယောက်ဟာ လုံးဝမပါပါဘူး။ ဖျောက်ထားပါတယ်။ အသက်ကတော့ အသက်နှစ်ဆယ်ကျော်သုံးဆယ်ဝန်းကျင်အရွယ်တွေပါ။”
“ဌာနတွေကို စုံစမ်းကြည့်ပေမယ့် တခုခုမှာရှိတယ်လို့လည်း မပြောကြပါဘူး။ ကျနော်တို့ဌာနတွေမှာ မရှိဘူး။ ရှိရင်လည်းတွေ့မရဘူးလို့ပြောပါတယ်။ အကျဉ်းချထားတယ်လို့ပဲပြောပါတယ်။”
“တခြားလူတွေကလွတ်ပေမယ့် ကိုယ့်လူတွေမပါလို့ စိတ်မကောင်းဖြစ်မိပါတယ်။တွေ့ခွင့်လည်းမရှိပါဘူး။သင်တန်းတက်မယ့်နေရာကိုပို့လိုက်တယ်လို့ပြောပေမယ့် ကျမအကိုက သင်တန်းတက်ဖို့အတွက်ဆေးစစ်ကြည့်တဲ့အခါ ဆေးလည်းမအောင်ပါဘူး။”
“သူ့မှာက အသဲရောင်အသားဝါဘီပိုးရှိပါတယ်။ ဒီမှာနေတုန်းကလည်း ဆေးခန်းပြဆေးသောက်နေရတာပါ။ သင်တန်းတက်နေတယ်ဆိုပြီး သင်တန်းမှာလည်းရိုက်ခံနေရတယ်လို့ပြောပါတယ်။ ကျမအကိုမောင်မောင်ချေနဲ့အတူ ကျန်တဲ့ကလေးတွေကိုလည်း အမြန်ဆုံးပြန်လွတ်စေချင်ပါတယ်။”
“ရုံးတွေမှာစာသွားတင်ပေမယ့် အားလုံးပယ်ချလိုက်ပါတယ်။ ဖမ်းသွားတဲ့ရက်ကမတူတော့ နှစ်လရှိတဲ့သူကရှိ သုံးလရှိတဲ့သူကရှိသွားပါပြီ။ သင်တန်းကွင်းကိုပို့ရအောင်လည်း သူတို့မှာဘာပြစ်ဒဏ်မှမရှိပါဘူး။”
“ကိုယ့်အကိုတွေကို လွတ်စေချင်သလို ကျန်တဲ့လူတွေကိုလည်းလွတ်စေချင်ပါတယ်။ ကျန်တဲ့သူတွေလွတ်လာပေမယ့် အဲဒီတဆယ့်ခုနှစ်ယောက်ကလုံးဝအဆ က်အသွယ်မရပါဘူး။”
“သင်တန်းကွင်းကိုပို့တယ်ဆိုတော့ စစ်မှုထမ်းခိုင်းဖို့ဖမ်းတယ်လို့ပဲထင်ပါတယ်။ စစ်မှုထမ်းဖို့ကလည်း ဆေးလည်းမအောင်ပါဘူး။”
“တွေ့ခွင့်လည်းမရသလို အစားအစာတွေပို့ပေးပေမယ့် သူတို့ကလက်မခံပါဘူး။ သူတို့ကို ဘယ်လိုထားလည်းဆိုတာကို စိတ်ပူနေကြတာပါ။”
