Border News Agency
မလေးရှား၊ စက်တင်ဘာ ၂၉။
မလေးရှားနိုင်ငံ၊ Perak ပြည်နယ်၊ Lumut မြို့ကနေ မြန်မာနိုင်ငံသားတထောင့်ငါးရာခန့်ကို အာဏာသိမ်းစစ်တပ်ရဲ့ ရေတပ်စစ်သင်္ဘောတွေနဲ့ စက်တင်ဘာလ ၂၉ ရက်၊ ဒီနေ့မှာပြန်ပို့မယ်လို့ အာဆီယံလူ့အခွင့်အရေးဆိုင်ရာ လွှတ်တော်အမတ်တွေအဖွဲ့ (APHR) က ထုတ်ပြန်လိုက်ပါတယ်။
ဒီနေ့မနက်ပိုင်းမှာ မြန်မာနိုင်ငံသား တထောင့်ငါးရာခန့်ကို ရဲတပ်ဖွဲ့ကလုံခြုံရေးယူပြီး Lumut မြို့ကို ဘတ်စ်ကားတွေနဲ့ပို့ဆောင်ခဲ့ကာ အဲဒီကနေတဆင့် မြန်မာ့ရေတပ်စစ်သင်္ဘောနှစ်စင်းနဲ့ ဆေးရုံသင်္ဘောတစ်စင်းတို့နဲ့ ပြန်လည်ခေါ်ဆောင်သွားမှာ ဖြစ်တယ်လို့ APHR က ဆိုပါတယ်။
အဲဒီပို့ဆောင်ခံရသူတွေဟာ မလေးရှားအစိုးရက ပြန်ပို့ဖို့သဘောတူထားတဲ့ လူဦးရေငါးထောင်ထဲက ပထမအသုတ်ဖြစ်ပြီး မလေးရှားလူဝင်မှုကြီးကြပ်ရေး ထိန်းသိမ်းရေးစခန်းတွေမှာ ဖမ်းဆီးခံထားရတဲ့ မြန်မာတသောင်းကျော်ထဲကရွေးချယ်ထားတာပါ။
ဒီလိုပြန်ပို့ခံရသူတွေဟာ စစ်တပ်ရဲ့ စစ်မှုထမ်းဥပဒေအတိုင်း အဓမ္မစစ်မှုထမ်းခိုင်းခံရမည့် အန္တရာယ်နဲ့ရင်ဆိုင်ရမှာဖြစ်သလို ထိန်းသိမ်းရေးစခန်းထဲကနေ ဆန္ဒအလျောက်ပြန်တာမဟုတ်ဘဲ ဖိအားပေးခံရတာသာ ဖြစ်တယ်လို့ APHR ရဲ့ တွဲဖက်ဥက္ကဋ္ဌ Charles Santiago က ထောက်ပြထားပါတယ်။
စစ်တပ်ကအရပ်သားတွေအပေါ် ရက်စက်စွာတိုက်ခိုက်နေစဉ်အတွင်း မြန်မာနိုင်ငံသားတွေကို ပြည်နှင်ဒဏ်ပေးနေတာကို ချက်ချင်းရပ်တန့်ပြီး ဘေးကင်းရာမပြန်လှည့်စေရေး မူကိုလိုက်နာဖို့ မလေးရှား ဝန်ကြီးချုပ် အန်ဝါ အီဘရာဟင်ကို APHR က တိုက်တွန်းထားပါတယ်။
