Border News Agency
ထားဝယ်၊ အောက်တိုဘာ ၂၀။
မြန်မာ၊ထိုင်းနဲ့ ရုရှား သုံးနိုင်ငံပူးပေါင်းပြီး ထားဝယ်ဒေသကိုအခြေပြုတဲ့ စွမ်းအင်ကုန်သွယ်မှုလုပ်ငန်းတွေ ဆောင်ရွက်ဖို့ကိစ္စကို ထည့်သွင်းဆွေးနွေးခဲ့ကြတယ်လို့ အာဏာသိမ်းစစ်တပ်က အောက်တိုဘာလ ၂၀ ရက်၊ဒီနေ့ထုတ်ပြန်ပါတယ်။
အဲဒီကိစ္စကို အာဏာသိမ်းစစ်တပ်ရဲ့ လျှပ်စစ်နဲ့စွမ်းအင်ဝန်ကြီးဦးကိုကိုလွင်နဲ့ ထိုင်းနိုင်ငံ စွမ်းအင်ဝန်ကြီး H.E. Mr. Akanat Promphan ဦးဆောင်တဲ့ ကိုယ်စားလှယ်အဖွဲ့တို့ အောက်တိုဘာလ ၁၉ ရက်၊မနက်ပိုင်းက နေပြည်တော်မှာတွေ့ဆုံချိန် ဆွေးနွေးခဲ့ကြတာဖြစ်ပါတယ်။
တွေ့ဆုံပွဲမှာသုံးနိုင်ငံ စွမ်းအင်ကုန်သွယ်မှုအပြင် နှစ်နိုင်ငံအကြား စွမ်းအင်ကဏ္ဍပူးပေါင်းဆောင်ရွက်ရေး နားလည်မှုစာချွန်လွှာ (MoU) ရေးထိုးနိုင်ရေးအတွက်လည်း ထည့်သွင်းပြောဆိုခဲ့ကြပါတယ်။
အဲဒီအပြင် လက်ရှိ သဘာဝဓာတ်ငွေ့စီမံကိန်းတွေမှာ အထွက်နှုန်းတိုးမြှင့်ရေး၊ ပိုက်လိုင်းတွေ စွမ်းဆောင်ရည်အပြည့်အဝ အသုံးပြုရေးနဲ့ ထိုင်းကုမ္ပဏီတွေက စီမံကိန်းအသစ်တွေမှာ ထပ်မံရင်းနှီးမြှုပ်နှံရေးကိစ္စတွေကိုလည်း ဆွေးနွေးခဲ့ကြတာဖြစ်ပါတယ်။
နောက်ပြီးသံလွင်မြစ်ဝှမ်းနဲ့တနင်္သာရီမြစ်ဝှမ်းမှာရှိတဲ့ရေအားလျှပ်စစ်စီမံကိန်းတွေ၊ နိုင်ငံဖြတ်ကျော် ဓာတ်အားလိုင်း စီမံကိန်းတွေနဲ့ လျှပ်စစ်ဓာတ်အား ဖြန့်ဖြူးရေးလုပ်ငန်းတွေမှာ ထိုင်းဘက်က ပါဝင်ရင်းနှီးမြှုပ်နှံရေးကိစ္စတွေလည်း ပါဝင်တယ်လို့ဆိုပါတယ်။
