Border News Agency
ကိုးရီးယား၊ နိုဝင်ဘာ ၆။
ဖက်ဒရယ်ဒီမိုကရေစီပြည်ထောင်စုပေါ်ထွန်းရေး ဦးဆောင်ကောင်စီ (SCEF) ကိုယ်စားလှယ်အဖွဲ့နဲ့ ကိုရီးယား အမျိုးသားလွှတ်တော်အမတ်တွေဟာ နိုဝင်ဘာလ ၅ ရက်နေ့က တွေ့ဆုံပြီးဖက်ဒရယ်ဒီမိုကရေစီ တည်ဆောက်ရေးနဲ့ မြန်မာနိုင်ငံရဲ့ လတ်တလော နိုင်ငံရေးအခြေအနေတွေကို ဆွေးနွေးခဲ့ကြပါတယ်။
အဲဒီလွှတ်တော်ဆွေးနွေးပွဲကို ကိုရီးယားဒီမိုကရက်ပါတီ၊ Rebuilding Korea Party (RKP) နဲ့ လွှတ်တော် နိုင်ငံခြားရေးနဲ့ ငြိမ်းချမ်းရေးဖိုရမ်တို့က ကမကထပြု ကျင်းပခဲ့တာဖြစ်ပြီး RKP လွှတ်တော်ကိုယ်စားလှယ်အဖွဲ့ ခေါင်းဆောင် ဂင်ဂျွန်ဟျောင်း ဦးဆောင်တဲ့ အမတ်တွေ တက်ရောက်ခဲ့ကြပါတယ်။
ဆွေးနွေးပွဲမှာ အမျိုးသားညီညွတ်ရေးအစိုးရ (NUG) နိုင်ငံခြားရေးဝန်ကြီး ဒေါ်ဇင်မာအောင်၊ စီမံကိန်း၊ ဘဏ္ဍာရေးနဲ့ရင်းနှီးမြှုပ်နှံမှုဝန်ကြီး ဦးတင်ထွန်းနိုင်၊ KNPP အတွင်းရေးမှူး (၁) Neineh Plo နဲ့ CNF အထွေထွေအတွင်းရေးမှူး Salai Thla Hei တို့က မြန်မာ့နိုင်ငံရေး ဖြစ်ထွန်းမှုတွေနဲ့ SCEF ရဲ့ ရည်မှ
န်းချက်တွေကို ရှင်းလင်းတင်ပြခဲ့ကြပါတယ်။
SCEF ကိုယ်စားလှယ်တွေက ကိုရီးယားနိုင်ငံအနေနဲ့ နိုင်ငံရေးအရ ထောက်ခံရုံတင် မဟုတ်ဘဲ နယ်စပ်နဲ့ ပြည်တွင်းက လူသားချင်းစာနာမှု အကူအညီတွေကို နယ်မြေထိန်းချုပ်ထားတဲ့ SCEF အဖွဲ့ဝင်တွေကတဆင့် ကူညီပေးဖို့နဲ့ ကိုရီးယား-အာဆီယံ ဆက်ဆံရေးကနေတစ်ဆင့် ဒီမိုကရေစီရေး တွန်းအားပေးဖို့ တောင်းဆိုခဲ့ကြပါတယ်။
အဲဒီအပြင် ကိုရီးယားလွှတ်တော်အမတ်တွေရဲ့ မေးမြန်းချက်တွေကို ပြန်လည်ဖြေကြားရာမှာ အာဏာသိမ်းစစ်တပ်ကို အသိအမှတ်မပြုတဲ့ ရပ်တည်ချက်ကို ဆက်လက်ထိန်းသိမ်းထားဖို့၊ကုလသမဂ္ဂ သံအမတ်ကြီးကို ဆက်လက်ထောက်ခံဖို့နဲ့ ပြည်သူတွေအတွက် အကူအညီတွေပေးဖို့ကိုလည်း တိုက်တွန်းခဲ့ပါတယ်။
