Border News Agency တွန်းဇံ၊ ဖေဖော်ဝါရီ ၂၃။ ချင်းပြည်နယ်၊ တွန်းဇံမြို့နယ်ရှိလူငယ်တွေကို တပ်သားသစ်စုဆောင်းမယ်လို့ တွန်းဇံမြို့နယ်ကောင်စီက ဖေဖော်ဝါရီလ ၂၂ ရက်၊ မနေ့က ထုတ်ပြန်ပါတယ်။ အဲဒီ တပ်သားသစ်စုဆောင်းတာကို ဖေဖော်ဝါရီလ ၂၂ ရက်နေ့ကစပြီး စုဆောင်းသွားမယ်လို့ ဆိုပါတယ်။ တွန်းဇံမြို့နယ်ကောင်စီကဦးဆောင်ပြီး ဖေဖော်ဝါရီလ ၁၄ ရက်နေ့ကပြုလုပ်တဲ့ ချင်းပြည်အစိုးရကာကွယ်ရေးဝန်ကြီးဌာနရဲ့ ပထမအကြိမ် Zoom အစည်းအဝေးမှာ ဆုံးဖြတ်ချက်ချခဲ့တာလို့ ဆိုပါတယ်။ တွန်းဇံမြို့နယ်အတွင်းရှိ လူငယ်တွေနဲ့ တွန်းဇံမြို့ကိုရောက်ရှိလာတဲ့ အသက် ၁၆ နှစ်မှ ၃၅ နှစ်ကြားရှိလူငယ်တွေကို အဓိကထားစုဆောင်းမှာလို့ ဆိုပါတယ်။ အဲဒါကြောင့် တွန်းဇံမြို့နယ်အတွင်းနေထိုင်ကြတဲ့ လူငယ်တွေနဲ့ ပြင်ပမှရောက်လာကြတဲ့ လူငယ်တွေကို CDF - တွန်းဇံဇိုတပ်ဖွဲ့နဲ့ CC တပ်ပေါင်းစုအတွက် တပ်သားစုဆောင်းမှာဖြစ်တယ်လို့ ဆိုပါတယ်။

Border News Agency ဂန့်ဂေါ၊ ဖေဖော်ဝါရီ ၂၃။ ဂန့်ဂေါခရိုင်တပ်ရင်း ၁၃နယ်မြေအတွင်း သွားလာလှုပ်ရှားနေထိုင်ကြတဲ့ပြည်သူတွေနဲ့ လက်နက်ကိုင်အဖွဲ့အစည်းတွေ  ညဘက်သွားလာခွင့်တားမြစ်တယ်လို့ ဂန့်ဂေါခရိုင်တပ်ရင်း ၁၃ မှ ဖေဖော်ဝါရီလ ၂၁ ရက်နေ့က ထုတ်ပြန်ပါတယ်။ အဲဒီဂန့်ဂေါခရိုင် တပ်ရင်း ၁၃ လှုပ်ရှားနယ်မြေဖြစ်တဲ့လမ်းတွေကို ည ၈နာရီမှ မနက် ၆ နာရီအတွင်း လုံခြုံရေးအခြေအနေအရ လုံးဝဖြတ်သန်းသွားလာခွင့်မပြုလုပ်ကြဖို့ အသိပေးထုတ်ပြန်လိုက်တာပါ။ ဆော၊ ကျောက်ထု၊ မင်းတပ်လမ်းတွေကို လုံခြုံရေးအခြေအနေအရ စစ်ဆေးနေလို့ ပြည်သူတွေနဲ့ လက်နက်ကိုင်အဖွဲ့အစည်းအနေနဲ့ ပူးပေါင်းပါဝင်ဆောင်ရွက်ပေးကြဖို့ အသိပေးထားပါတယ်။ ကန့်သတ်ထားတဲ့နယ်မြေကို ခုအချိန်မှာ ဂန့်ဂေါခရိုင်အတွင်းမှ တပ်ရင်းတပ်ဖွဲ့တွေမှလွဲပြီး ဘယ်လက်နက်ကိုင်အဖွဲ့အစည်းမဆို သက်ဆိုင်ရာခရီးသွားလာခွင့် (MO) ပါမှသာ ဖြတ်သန်းသွားလာခွင့်ရှိတယ်လို့ ဆိုပါတယ်။ အရေးပေါ်ကိစ္စတွေနဲ့သွားလာလိုရင် ဂန့်ဂေါခရိုင်တပ်ရင်း ၁၃ ဆီကိုအကြောင်းကြားမှ ခွင့်ပြုမှာဖြစ်ပြီး ကန့်သတ်ထားတဲ့ အချိန်မှာအကြောင်းမကြားပဲသွားလာခဲ့ရင် ထိရောက်စွာအရေးယူဆောင်ရွက်သွားမယ်လို့ ဆိုပါတယ်။

​အာဖဂန်နစ္စတန်နိုင်ငံ၊ အရှေ့ပိုင်း နန်ဂါဟာ (Nangarhar) နဲ့ ပက်တီကာ (Paktika) ပြည်နယ်တွေထဲကို ပါကစ္စတန်နိုင်ငံက လေကြောင်းတိုက်ခိုက်ခဲ့တာကြောင့် အမျိုးသမီးနဲ့ ကလေးငယ်တွေအပါအဝင်အရပ်သား အများအပြားသေဆုံးခဲ့တယ်လို့ အာဖဂန်ကာကွယ်ရေးဝန်ကြီးဌာနက ဖေဖော်ဝါရီလ ၂၂ ရက်၊ မနေ့ကထုတ်ပြန်ပါတယ်။ ​အဲဒီလေကြောင်းတိုက်ခိုက်မှုနဲ့ ပတ်သက်ပြီး နန်ဂါဟာရဲတပ်ဖွဲ့ ပြောရေးဆိုခွင့်ရှိသူ Sayed Tayeeb Hammad က "အရပ်သားတွေ သေဆုံးခဲ့ရပါတယ်။ အိမ်တလုံးတည်းမှာတင်မိသားစုဝင် ၂၃ ဦးရှိနေပြီး ၅ ဦးကိုတော့ဒဏ်ရာတွေနဲ့ ကယ်ထုတ်နိုင်ခဲ့တယ်။"လို့ AFP သတင်းဌာနကို ပြောကြားခဲ့ပါတယ်။ အဲဒီလိုလေကြောင်းတိုက်ခိုက်တာဟာ စာသင်ကျောင်းတွေနဲ့ လူနေအိမ်တွေကို တိုက်ရိုက်ထိမှန်ခဲ့တာဖြစ်တယ်လို့လည်း အာဖဂန်ကာကွယ်ရေးဝန်ကြီးဌာနက ဆိုပါတယ်။ ​ပါကစ္စတန်နိုင်ငံဘက်ကတော့ သူတို့နယ်မြေအတွင်း တိုက်ခိုက်မှုတွေလုပ်နေတဲ့ လက်နက်ကိုင်အဖွဲ့တွေဟာ အာဖဂန်နယ်မြေကို အသုံးချနေတာကြောင့် တိုက်ခိုက်ရတာလို့ဆိုထားပေမယ့် အာဖဂန်အာဏာပိုင်တွေကတော့ ဒီစွပ်စွဲချက်ကို အကြိမ်ကြိမ် ငြင်းဆိုထားပါတယ်။ အာဖဂန်ကာကွယ်ရေးဝန်ကြီးဌာနက ပါကစ္စတန်ရဲ့ လုပ်ရပ်အပေါ် "သင့်တော်ပြီး တွက်ချက်ထားတဲ့တုံ့ပြန်မှုမျိုး ပြုလုပ်သွားမယ်။"လို့ သတိပေး ပြောကြားထားပါတယ်။ ပြီးခဲ့တဲ့ အောက်တိုဘာလကနေ ဒီဇင်ဘာလအတွင်း ပါကစ္စတန်ရဲ့စစ်ရေးလှုပ်ရှားမှုတွေကြောင့် အာဖဂန်အရပ်သား ၇၀ ဦးအထိ သေဆုံးခဲ့ရပြီး ဖြစ်တယ်လို့ ​ကုလသမဂ္ဂအဖွဲ့ (UN) ရဲ့ ထုတ်ပြန်ချက်အရသိရပါတယ်။ အဲဒီ ကာတာ၊ တူရကီနဲ့ ဆော်ဒီအာရေးဗီးယားနိုင်ငံတို့က ကြားဝင်စေ့စပ်ပေးတာတွေရှိနေပေမယ့် နှစ်နိုင်ငံနယ်စပ်တွေ လပေါင်းများစွာပိတ်ထားရတာကြောင့် ဒေသခံတွေမှာ လူမှုစီးပွားအခက်အခဲတွေနဲ့ ရင်ဆိုင်နေရတယ်လို့ သိရပါတယ်။

ပလက်ဝမြို့နယ်၊ တွီကင်းဝရွာမှာ ဖေဖော်ဝါရီ ၂၁ ရက်နေ့၊ နေ့လည် ကမီးလောင်မှုကြောင့် နေအိမ်အိမ်ဆယ်လုံးပျက်စီးတယ်လို့ သိရပါတယ်။ အဲဒီတွီကင်းဝရွာက ဦးကျော်သာဦးရဲ့အိမ်ဟာ ဖေဖော်ဝါရီ ၂၁ ရက်နေ့၊ နေ့လည် ၃ နာရီအချိန်ခန့်က ရေနွေးကျိုရာကနေ ဘေးရှိဝါးထရံကိုမီးကူးသွားပြီး မီးစလောင်သွားတယ်လို့ သိရပါတယ်။ အဲဒါကြောင့် ရွာသားတွေ ဝိုင်းဝန်းကူညီ မီးငြိမ်းသတ်ခဲ့ပေမယ့် မီးလောင်နေတဲ့အချိန်လေပြင်းတွေတိုက်နေလို့ မီးစတွေဟာ ဘေးအိမ်တွေကိုပါ ကူးစက်လောင်ကျွမ်းသွားပြီး ရွာထဲရှိအိမ်ဆယ်လုံးထိမီးလောင်ပျက်စီးသွားခဲ့ပါတယ်။ အဲဒီ မီးလောင်မှုကိုတော့ အာရက္ခပြည်သူ့တော်လှန်ရေးအစိုးရရဲ့ မီးသတ်ဌာနနဲ့ရွာသားတွေ ဝိုင်းဝန်းကူညီငြိမ်းသတ်ခဲ့မှုကြောင့် ညနေ ၅ နာရီအချိန်ခန့်မှာ မီးငြိမ်းသွားတယ်လို့ သိရပါတယ်။ မီးလောင်မှုနဲ့ပတ်သက်ပြီး မီးစလောင်ခဲ့တဲ့ အိမ်ရဲ့ကို တရားဥပဒေစိုးမိုးရေးနဲ့ ပြည်သူ့လုံခြုံရေးဌာန (DLEPS) မှ ဥပဒေလုပ်ထုံးလုပ်နည်းနဲ့အညီ အရေးယူဆောင်ရွက်နေပါတယ်။

Border News Agency ပါကစ္စတန်၊​ ဖေဖော်ဝါရီ ၂၂ ။ ​ပါကစ္စတန်တပ်မတော်ဟာ ဖေဖော်ဝါရီ ၂၂ ရက်၊ ဒီနေ့အစောပိုင်းမှာ အာဖဂန်နစ္စတန်နိုင်ငံအတွင်းက လက်နက်ကိုင်စခန်းတွေကို လေကြောင်းတိုက်ခိုက်ခဲ့တာကြောင့် အမျိုးသမီးနဲ့ကလေးငယ်တွေအပါအဝင် လူပေါင်းဒါဇင်နဲ့ချီ သေဆုံးဒဏ်ရာရခဲ့တယ်လို့ နိုင်ငံတကာသတင်းတွေအရသိရပါတယ်။ ​ပါကစ္စတန်ဘက်ကတော့ ဒီတိုက်ခိုက်မှုဟာ ပြီးခဲ့တဲ့ရက်ပိုင်းက တပ်မတော်အရာရှိတဦးအပါအဝင် စစ်သည်တွေသေဆုံးခဲ့ရတဲ့ တိုက်ခိုက်မှုတွေကို လက်တုံ့ပြန်တာဖြစ်ပြီး နယ်စပ်ရှိ TTP နဲ့ IS အဖွဲ့ခွဲစခန်း ၇ ခုကို ပစ်မှတ်ထားခဲ့တာလို့ ဆိုပါတယ်။ ဒါပေမယ့် အာဖဂန်ကာကွယ်ရေးဝန်ကြီးဌာနကတော့ ဗုံးကြဲမှုဟာဘာသာရေးစာသင်ကျောင်းနဲ့ လူနေအိမ်တွေကို ထိမှန်ခဲ့တာဖြစ်လို့ ဒါဟာအပြည်ပြည်ဆိုင်ရာဥပဒေကို ချိုးဖောက်တာဖြစ်တယ်လို့ တုံ့ပြန်ထားပါတယ်။ ​ဒီလေကြောင်းတိုက်ခိုက်မှုကြောင့် နန်ဂါဟာပြည်နယ်တခုတည်းမှာတင် အနည်းဆုံး လူ ၁၇ ဦး သေဆုံးခဲ့ရပြီး အခုဖြစ်စဉ်ဟာ ပြီးခဲ့တဲ့နှစ်ကမှရရှိထားတဲ့ နှစ်နိုင်ငံကြားပျက်စီးလွယ်တဲ့ အပစ်အခတ်ရပ်စဲရေးကိုပါ ခြိမ်းခြောက်နေပါတယ်။ ဒါကြောင့် ပါကစ္စတန်နဲ့ အာဖဂန်နစ္စတန်နယ်စပ်တလျှောက် စစ်ရေးတင်းမာမှုတွေ အမြင့်ဆုံးအဆင့်ကို ရောက်ရှိနေပါတယ်။

Border News Agency ​မြောက်ဦး၊ ဖေဖော်ဝါရီ ၂၂။ ​အာရက္ခတပ်တော် (AA) ထိန်းချုပ်ထားတဲ့မြောက်ဦးမြို့ကို စစ်ကော်မရှင်တပ်လေကြောင်းတိုက်ခိုက်ခဲ့လို့ ဒဏ်ရာရသွားခဲ့တဲ့ အသက် ၆၀ အရွယ် အမျိုးသမီးတဦးထပ်မံသေဆုံးသွားတယ်လို့ သိရပါတယ်။ အဲဒီ ​သေဆုံးသွားသူဟာ စစ်တွေဘက်ကနေ မြောက်ဦးမှာ လာရောက်စစ်ဘေးရှောင်နေတဲ့ ဒေါ်အောင်မစိန်ဖြစ်ပြီး ပြီးခဲ့တဲ့ ဖေဖော်ဝါရီလ၂၀ ရက်နေ့ မနက်ပိုင်းမှာပဲ ဆေးကုသနေရင်းဒဏ်ရာပြင်းထန်တာကြောင့် သေဆုံးသွားခဲ့တာပါ။  သူမဟာ ပြီးခဲ့တဲ့ဖေဖော်ဝါရီ ၁၂ ရက်နေ့က စစ်ကော်မရှင်တပ် စစ်ဘေးရှောင်တွေခိုလှုံတဲ့နေရာကို ပေါင် ၅၀၀ ဗုံးနဲ့လေကြောင်းတိုက်ခိုက်ခံရစဉ် ကျောကုန်းနဲ့ခြေထောက်တွေမှာ ဒဏ်ရာပြင်းပြင်းထန်ထန်ရသွားတာကြောင့် ဆေးကုသမှုခံယူနေရင်း သေဆုံးသွားတာလို့ ဆိုပါတယ်။ ​အဲဒီလေကြောင်းတိုက်ခိုက်မှုတုန်းက ဒေါ်အောင်မစိန်ရဲ့ အသက် ၂ လသားအရွယ် မြေးဖြစ်သူ ကလေးငယ်လည်း သေဆုံးခဲ့ရသလို တခြားအရပ်သားပြည်သူ ၇ ဦးလည်း ဒဏ်ရာရသွားခဲ့ကြတာပါ။ စစ်ကော်မရှင်တပ်ဟာ အာရက္ခတပ်တော်ထိန်းချုပ်နယ်မြေကို နေ့စဥ်နဲ့အမျှလေကြောင်း၊ လက်နက်ကြီးတွေနဲ့ ပစ်ခတ် တိုက်ခိုက်နေတာကြောင့် အရပ်သားတွေ သေဆုံး၊ ဒဏ်ရာရနေကြရပါတယ်။ အဲဒီအပြင် စစ်ကော်မရှင်တပ်ဟာ အာရက္ခဒေသကို တိုက်လေယာဉ်တွေ၊ ဒရုန်းတွေနဲ့ ကင်းထောက်နေတာကြောင့် ပြည်သူတွေအနေနဲ့ လေကြောင်း၊ ရေကြောင်းရန်တွေကို အထူးသတိပြုကြဖို့ အာရက္ခတပ်တော်က အသိပေးထားပါတယ်။