Border News Agency
ကျောက်ဖြူ၊ အောက်တိုဘာ ၁၁။
စစ်ကော်မရှင်ရေတပ်က ဖမ်းဆီးမှုတွေ၊ ပစ်ခတ်တိုက်ခိုက်မှုတွေကြားမှာ ရေလုပ်သားတွေဟာ အသက်စွန့်ဝမ်းစာရှာဖွေနေကြရတယ်လို့ ရေလုပ်သားတွေက ဆိုကြပါတယ်။
တရုတ်စီမံကိန်းတွေတည်ရှိတဲ့ မဒေးကျွန်းအနီးသံဇစ်မြစ်မှာ ကျောက်ဖြူမြို့နယ်က ရေလုပ်သားတွေဟာ ငါးဖမ်းခွင့်မရကြတာမို့ ဘဝရပ်တည်ရေးခက်ခဲနေကြတယ်လို့ ရေလုပ်သားတွေက ဆိုကြပါတယ်။
အဲဒီသံဇစ်မြစ်အတွင်း မဒေးကျွန်း၊ စစ်တော၊ သဲတန်း၊ သဲချောင်း၊ ဂန့်ဂါ၊ ဂြင်ကြီး၊ ငစိမ့်ပြင်၊ ဦးကင်း၊ စိုင်ခြုံစတဲ့ကျေးရွာလေးဆယ်ခန့်အပြင် ပြင်ဖြူမော်၊ ညင်တော၊ ငလပွေ့၊ တောင်းရင်းရပ်ကွက်တွေက ဒေသခံတွေဟာ ရေလုပ်ငန်းနဲ့မိသာစုစားဝတ်ရေးကို ဖြေရှင်းနေကြရတာလို့ ဆိုကြပါတယ်။
အဲဒီရေလုပ်သားတွေကို စစ်ကော်မရှင်တပ်က မီးလောင်ကွင်းထိသာ ငါးဖမ်းခွင့်ပေးထားပြီး ငါးဖမ်းဧရိယာထက်ကျော်ရင် စစ်ကော်မရှင်တပ်ကဖမ်းဆီးအရေးယူနေတယ်လို့ ရေလုပ်သားတွေက ဆိုကြပါတယ်။
“မီးလောင်ကွင်းထက်ကျော်ပြီးတော့ ပြင်ဖြူမော်ဖက်ကို သွားဖမ်းလို့မရပါဘူး။ အဲဒီဘက်ကျော်ရင် စစ်တပ်ကဖမ်းပါတယ်။ ငါးမရတော့ အဲဒီဘက်ကို ရောက်သွားတဲ့အခါရှိပါတယ်။ သူတို့ကဖမ်းမှ ဒီဘက်မှာငါးမဖမ်းရဘူးပြောတာပါ။ တိုက်ပွဲတွေလည်းဖြစ်နေတော့ ဝမ်းရေးကခက်ပါတယ်။ အဖမ်းအဆီးတွေရှိလည်း အဲ့ကြားကနေရေလုပ်ငန်းလုပ်ပြီး ဝမ်းစာရှာနေရတာပါ”လို့ ကျောက်ဖြူမြို့နယ်မှ ရေလုပ်သားတဦးက Border News Agency ကို ပြောပါတယ်။
စစ်ကော်မရှင်တပ်ဟာ ရေလုပ်သားတွေကို ဖမ်းဆီးငွေညှစ်တာတွေ၊ ငါးဖမ်းစက်လှေနဲ့ငါးဖမ်းပိုက်ကွန်တွေကို သိမ်းယူတာတွေ ပြုလုပ်နေတယ်လို့ ရေလုပ်သားတွေက ဆိုကြပါတယ်။
အဲဒီကျောက်ဖြူမြို့နယ်၊ ဆားပြင်ကွင်းရပ်ကွက်က ရေလုပ်သားဆယ်ဦးကို အောက်တိုဘာလ ၃ ရက်နေ့ စစ်ကော်မရှင်တပ်ဖမ်းဆီးသွားခဲ့ပါတယ်။
အဲဒီအပြင် ပေါက်တောမြို့နယ်က ရေလုပ်သားတွေကိုလည်း စစ်ကော်မရှင်ရေတပ်က ဆက်တိုင်းဖမ်းဆီးနေတာမို့ ပင်လယ်ပြင်ထွက်ငါးဖမ်းဖို့ စိုးရိမ်နေကြရတယ်လို့ ရေလုပ်သားတွေက ဆိုကြပါတယ်။
ဒါပေမယ့် အသက်ရှင်ရပ်တည်ရေး၊ စားဝတ်နေရေးအတွက် အသက်စွန့်ပြီးဝမ်းစာရှာငါးဖမ်းနေကြရတယ်လို့ ရေလုပ်သားတွေက ဆိုကြပါတယ်။
“ပင်လယ်ပြင်မှာက စစ်တပ်က ရေတပ်နေဗီတွေအမြဲသွားလာနေတာပါ။ အဝေးကဆိုလည်းချိန်ပြောင်းနဲ့ကြည့်ပြီး အမြန်ယာဥ်တွေနဲ့လာဖမ်းပါတယ်။ တခြားအလုပ်လည်းမလုပ်တတ်ပါဘူး။ အဖမ်းအဆီးတွေရှိလည်း အငတ်မနေနိုင်တော့ ပိုက်ချထွက်ရတာပါပဲ။”လို့ ပေါက်တောမြို့နယ်မှ ရေလုပ်သားတဦးက Border News Agency ကို ပြောပါတယ်။
အဲဒီပေါက်တောမြို့နယ်၊ ချောင်းဝနဲ့ ကုန်တန်းကျေးရွာက ငါးဖမ်းသမားခုနှစ်ဦးကိုလည်း စက်တင်ဘာလ ၁၆ ရက်နေ့က စစ်ကော်မရှင်ရေတပ်ဟာ အမြန်ရေယာဥ်ငယ်တွေနဲ့ လာရောက်ဖမ်းဆီးသွားခဲ့ပါတယ်။
အဲဒီအပြင် ပေါက်တောမြို့နယ်၊ တန်းတင်ကျေးရွာနဲ့ ငရုပ်ချောင်းရွာက ငါးဖမ်းသမားခြောက်ဦးကိုလည်း စက်တင်ဘာလ ၈ ရက်နေ့က စစ်ကော်မရှင်ရေတပ်မှ ဖမ်းဆီးသွားခဲ့ပါတယ်။
နောက်ပြီး ပေါက်တောမြို့နယ်၊ မြေငူကျွန်းအနီးမှာပြီးခဲ့တဲ့ ဧပြီလ ၅ ရက်နေ့ ကလည်း ငါးဖမ်းသမားနှစ်ဆယ်သုံးဦးကို စစ်ကော်မရှင်ရေတပ်က ဖမ်းဆီးသွားခဲ့ပါတယ်။
စစ်ကော်မရှင်တပ်စစ်သင်္ဘောတွေဟာ အရပ်သားပြည်သူနေထိုင်ရာရပ်ကွက်၊ ကျေးရွာတွေအတွင်းသို့ လက်နက်ကြီးပစ်ခတ်တိုက်ခိုက်တာ၊ ပင်လယ်ပြင်ကမ်းနီးအတွင်း ဝမ်းစာရှာငါးဖမ်းထွက်နေကြတဲ့ ရေလုပ်သားတွေကိုဖမ်းဆီးတာ၊ သတ်ဖြတ်တာတွေ ဆက်တိုက်ပြုလုပ်နေတယ်လို့ အာရက္ခတပ်တော်ထုတ်ပြန်ထားပါတယ်။
