Border News Agency
နေပြည်တော်၊ အောက်တိုဘာ ၁၉။
ရွေးကောက်ပွဲဝင်မယ့် နိုင်ငံရေးပါတီတွေဟာ ရွေးကောက်ပွဲဆိုင်ရာ စုဝေးဟောပြောတာနဲ့ မဲဆွယ်စည်းရုံးရေးစည်းကမ်းတွေကို မလိုက်နာရင် အရေးယူခံရမယ်လို့ ပြည်ထောင်စုရွေးကောက်ပွဲကော်မရှင်က သတိပေးလိုက်ပါတယ်။
ပြည်ထောင်စုရွေးကောက်ပွဲ ကော်မရှင်နဲ့နိုင်ငံရေးပါတီတွေဟာ အောက်တိုဘာ လ ၁၈ ရက်၊ မနေ့က နေပြည်တော်ရှိပြည်ထောင်စု ရွေးကောက်ပွဲကော်မရှင်ရုံးမှာ တွေ့ဆုံခဲ့ကြတာပါ။
အဲဒီတွေ့ဆုံပွဲမှာ ပြည်ထောင်စုရွေး ကောက်ပွဲကော်မရှင်က ခုလိုသတိပေးခဲ့တာဖြစ်ပါတယ်။
“ရွေးကောက်ပွဲဆိုင်ရာ စုဝေးဟောပြောတာနဲ့ မဲဆွယ်စည်းရုံးတာတွေကိုဆက်စပ်ပြီး ကြေညာချက်ထုတ်ပြန်ထားပြီ ဖြစ်ပါတယ်။ ပါတီဝင်တွေ၊ ပါတီထောက်ခံသူတွေလည်းသိရှိအောင် အသိပေးထိန်းကျောင်းဖို့ လိုအပ်ပါတယ်။” လို့ ပြည်ထောင်စုရွေးကောက်ပွဲကော်မရှင် ဥက္ကဋ္ဌသန်းစိုးက ပြောပါတယ်။
လာမယ့်ရွေးကောက်ပွဲအတွက် နိုင်ငံရေးပါတီတွေ မဲဆွယ်စည်းရုံးရေးကာလကို အောက်တိုဘာလ ၂၈ ရက်နေ့၊ မနက် ၆ နာရီမှဒီဇင်ဘာလ ၂၆ ရက်နေ့၊ ည ၁၂ နာရီထိ ရက်ပေါင်းခြောက်ဆယ် ခွင့်ပြုထားပါတယ်။
လာမယ့်ရွေးကောက်ပွဲမှာ တနိုင်ငံလုံးဝင်ပြိုင်မယ့် ခြောက်ပါတီ၊ တိုင်းဒေသကြီးတွေ၊ ပြည်နယ်တွေမှာ ဝင်ပြိုင်မယ့် ငါးဆယ့်တပါတီရှိပါတယ်။
အဲဒီပါတီတွေက ကိုယ်စားလှယ်လောင်း ငါးထောင်ကျော်ဝင်ရောက်ပြိုင်ကြမှာပါ။
ဒေါက်တာအေးမောင်ဦးဆောင်တဲ့ ရခိုင့်ဦးဆောင်ပါတီက ဒေါက်တာအေးမောင်အပါအဝင် ကိုယ်စားလှယ်လောင်း လေးဆယ်တဦးဝင်ပြိုင်ပါမယ်။
”သတ်မှတ်ပြဋ္ဌာန်းချက်တွေကို ဖောက်ဖျက်ကျူးလွန်ရင် သက်ဆိုင်ရာဥပဒေတွေနဲ့ အရေးယူခံရပါမယ်။ ပါတီစုံဒီမိုကရေစီ အထွေထွေရွေးကောက်ပွဲတွေကို နှောင့်ယှက်ဟန့်တားဖျက်ဆီးပေးတာမှ ကာကွယ်ပေးရေးဥပဒေနဲ့ ငြိစွန်းတာတွေမရှိဖို့ သတိပြုရပါမယ်။”လို့ ပြည်ထောင်စုရွေးကောက်ပွဲကော်မရှင် ဥက္ကဋ္ဌသန်းစိုးက ပြောပါတယ်။
စစ်ကော်မရှင်လက်အောက်ခံ ရခိုင်ပြည်နယ်အမျိုးသား အင်အားစုပါတီ(RSNUP)၊ ခမီအမျိုးသားဖွံ့ဖြိုးတိုးတက်ရေးပါတီ၊ မြိုတိုင်းရင်းသားပါတီ၊ မြိုတိုင်းရင်းသားဖွံ့ဖြိုးရေးပါတီ(MNDP)၊ ရခိုင်တိုင်းရင်းသားများပါတီ(RNP)၊ ရခိုင့်ရှေ့ဆောင်ပါတီ(AFP) ဝင်ပြိုင်ကြပါမယ်။
စစ်တွေ၊ ကျောက်ဖြူ၊ မာန်အောင် သုံးမြို့နယ်ကိုသာ စစ်ကော်မရှင်တပ်က ထိန်းချုပ်ထားပေမယ့် အာရက္ခတပ်တော်ထိန်းချုပ်ထားတဲ့ အမ်း၊ ဂွ၊ သံတွဲ၊ တောင်ကုတ်စတဲ့ မြို့နယ်တွေမှာလည်း ရွှေးကောက်ပွဲကျင်းပမယ်လို့ ထုတ်ပြန်ထားပါတယ်။
