Border News Agency
ကျောက်ဖြူ၊ ဇန်နဝါရီ ၂၇။
ကျောက်ဖြူမြို့နယ်၊ မူရွင်းရွာကို ဇန်နဝါရီ လ၂၄ ရက်နေ့က စစ်ကော်မရှင်တပ် လေကြောင်းတိုက်ခိုက်လို့ စစ်ဘေးရှောင်နှစ်ဦးသေဆုံးပြီး လသားအရွယ်ကလေးတဦးအပါအဝင် ငါးဦးဒဏ်ရာရသွားခဲ့ပါတယ်။
အဲဒီ ဒဏ်ရာရသူတွေထဲက ဒဏ်ရာပြင်းလို့ဆေးကုသနေတဲ့ လသားအရွယ်ကလေးတဦး ဇန်နဝါရီလ ၂၆ ရက်နေ့ကသေဆုံးသွားတယ်လို့ ဒေသခံတွေဆိုပါတယ်။
အဲဒီလသားအရွယ်ကလေးဟာ ကျောက်ဖြူမြို့နယ်၊ စိုင်ခြုံဒွိန်ရွာမှ ဦးညီစိကေနဲ့ ဒေါ်ခိုင်နှင်းရီတို့ရဲ့သား မောင်အေးမင်းခိုင်ဖြစ်ပါတယ်။
အဲဒီမူရွင်းရွာရှိ အရပ်သားပြည်သူတွေ စစ်ရှောင်နေကြတဲ့စာသင်ကျောင်းကို ဇန်နဝါရီလ ၂၄ ရက်၊ နေ့လည် ၁၂ နာရီ ၅၆ မိနစ်အချိန်က စစ်ကော်မရှင်တပ်က အသေခံဒရုန်းနဲ့လေကြောင်းတိုက်ခိုက်ခဲ့တာပါ။
အဲဒီလိုတိုက်ခိုက်လို့ ကျောက်ဖြူမြို့နယ်၊ သိုင်းချောင်းရွာမှ အသက်ရှစ်ဆယ့်တနှစ်အရွယ် ဒေါ်ဖြူနုမနဲ့ အသက်ငါးဆယ့်ခြောက်နှစ်အရွယ် ဦးမှဲ့ဒေါင်းတို့ အဲဒီနေ့ကတည်းကသေဆုံးခဲ့ပါတယ်။
အဲဒီအပြင် စိုင်ခြုံဒွိန်ရွာမှ အသက်ကိုးလအရွယ် မောင်အေးမင်းခိုင်၊ အသက်သုံးဆယ့်လေးနှစ်အရွယ် ဒေါ်ခင်ဆန်းဝင်း၊ သိုင်းချောင်းရွာမှ အသက်ငါးဆယ့်ခြောက်နှစ်အရွယ် ဒေါ်မမြရင်၊ ဇိုင်ချောင်းရွာမှ အသက်ခြောက်ဆယ့်ခုနှစ်နှစ်အရွယ် ဒေါ်ဘနုမနဲ့ အသက်ခြောက်ဆယ့်သုံးနှစ်အရွယ် ဦးမောင်ကျော်တို့ ဒဏ်ရာရသွားခဲ့ကြပါတယ်။
စစ်ကော်မရှင်တပ်ဟာ အရပ်သားပြည်သူတွေကို ရည်ရွယ်ချက်ရှိရှိလေကြောင်း၊ လက်နက်ကြီးတွေနဲ့ ပစ်ခတ်တိုက်ခိုက်တာတွေပြုလုပ်နေတာကြောင့် အရပ်သားပြည်သူတွေ သေဆုံး၊ ဒဏ်ရာရနေကြပါတယ်။
