Border News Agency
မကွေး၊ ဧပြီ ၁၁။
မြန်မာနိုင်ငံကိုဖိနှိပ်အုပ်ချုပ်နေတဲ့ စစ်အာဏာရှင်စနစ်အမြစ်ပြတ်ချေမှုန်းရေးမှာ အာရက္ခတပ်တော်(AA)အပါအဝင် တော်လှန်ရေးအဖွဲ့အစည်းအားလုံးနဲ့ လက်တွဲဆောင်ရွက်သွားမယ်လို့ အမျိုးသားညီညွတ်ရေးအစိုးရ (NUG) က ဧပြီလ ၁၀ ရက်၊ မနေ့ကထုတ်ပြန်ပါတယ်။
AAတည်ထောင်တဲ့ ၁၇ နှစ်မြောက် အထိမ်းအမှတ်နေ့အတွက် NUG ကာကွယ်ရေးဝန်ကြီးဌာနက ပေးပို့တဲ့ဂုဏ်ပြုသဝဏ်လွှာမှာ အခုလို ထည့်သွင်းဖော်ပြထားတာဖြစ်ပါတယ်။
၂၀၀၉ ခုနှစ်က လိုင်ဇာမှာစတင်ခဲ့တဲ့ AA ဟာ ၁၇ နှစ်အတွင်း အာရက္ခဒေသမှာကြီးမားတဲ့ စစ်ရေး၊ နိုင်ငံရေး အောင်မြင်မှုတွေရရှိနေတာကိုလည်း ဂုဏ်ယူဝံ့ကြွားစွာတွေ့မြင်နေရတယ်လို့ ဆိုပါတယ်။
အဲဒီအပြင်တော်လှန်ရေးခရီးကြမ်းအတွင်း အသက်၊ သွေး၊ ချွေး ပေးဆပ်ခဲ့ကြတဲ့ အာရက္ခတပ်တော်သားတွေနဲ့ အာရက္ခပြည်သူအားလုံးကိုလည်း လေးစားဂုဏ်ယူတယ်လို့လည်းဆိုပါတယ်။
AA ရဲ့အောင်ပွဲတွေဟာ တနိုင်ငံလုံးအတိုင်းအတာနဲ့ စစ်အာဏာရှင်စနစ်တိုက်ဖျက်ရေးအတွက် အားကောင်းတဲ့အင်အားတရပ်ဖြစ်စေသလို ပြည်သူတွေရဲ့မျှော်လင့်ချက်ကိုလည်း အကောင်အထည်ဖော်ပေးနိုင်နေပြီလို့ချီးကျူးထားပါတယ်။
