Border News Agency
အီရန်၊ဧပြီ ၁၈။
အီရန်နဲ့နျူကလီးယား သဘောတူညီချက်ရဖို့ အတော်လေး နီးစပ်နေပြီလို့ အမေရိကန်သမ္မတ ဒေါ်နယ်ထရမ့်က အိမ်ဖြူတော်မှာ သတင်းထောက်တွေကို ပြောကြားလိုက်ပါတယ်။
အီရန်ဘက်က နျူကလီးယားလက်နက် မထုတ်ဖို့နဲ့ မြေအောက်မှာဝှက်ထားတဲ့ နျူကလီးယားပစ္စည်းတွေကို ပြန်ပေးဖို့အထိ သဘောတူထားတယ်လို့ ထရမ့်က ဆိုပါတယ်။
ဒါပေမယ့် အီရန်နိုင်ငံခြားရေးဌာနကတော့ ယူရေနီယံသန့်စင်မှုဟာ သူတို့ရဲ့ အခွင့်အရေးဖြစ်ပြီး ဆက်လုပ်သွားမှာဖြစ်တယ်လို့ တုံ့ပြန်ထားပါတယ်။
ထရမ့်ကတော့ လာမယ့်သီတင်းပတ်ကုန်မှာတင် သဘောတူညီချက် ရနိုင်ခြေရှိပြီး ပါကစ္စတန်မှာ လက်မှတ်ထိုးမယ်ဆိုရင် သူကိုယ်တိုင် သွားရောက်မယ်လို့ပါ ကြုံးဝါးထားတာပါ။
ဒီကြားဝင်စေ့စပ်မှုမှာ ပါကစ္စတန်က အဓိကအခန်းကဏ္ဍက ပါဝင်နေပြီး ပါကစ္စတန်စစ်တပ်အကြီးအကဲက အီရန်ခေါင်းဆောင်တွေနဲ့ သွားရောက်ညှိနှိုင်းနေပါတယ်။
ဒါဟာ အစ္စရေးနဲ့ လက်ဘနွန်ကြား ၁၀ ရက်ကြာ အပစ်ရပ်စဲရေး ရရှိသွားပြီးနောက် ထွက်ပေါ်လာတဲ့ နိုင်ငံတကာ သံတမန်ရေးရာ အလှည့်အပြောင်းတခု ဖြစ်ပါတယ်။
မြေပြင်မှာတော့ အီရန်စစ်ဘက်အရာရှိတချို့က အပစ်ရပ်စဲမှုကို သက်တမ်းတိုးဖို့ထက် စစ်ပွဲအတွက် အမြဲအသင့်ရှိနေတယ်လို့ သတိပေးထားတာကြောင့် အခြေအနေက ရှုပ်ထွေးနေဆဲပါ။
လာမယ့် ဧပြီ ၂၂ ရက်မှာ အပစ်ရပ်သက်တမ်း ကုန်ဆုံးတော့မှာဖြစ်လို့ အဲဒီမတိုင်ခင် အပြီးသတ် သဘောတူညီမှု ရ၊ မရဆိုတာက ဒေသတွင်းငြိမ်းချမ်းရေးအတွက် အဆုံးအဖြတ် ဖြစ်လာမှာ ဖြစ်ပါတယ်။
