Border News Agency
ကာမိုင်း၊ မေ ၅။
မြန်မာပြည်တွင်းက ကာမိုင်းမြို့နဲ့ မအူပင်မြို့အနီးတွေကို ဗဟိုပြုပြီး အင်အားအနည်းငယ်ရှိတဲ့မြေငလျင်တွေ မေလ ၅ ရက်၊ ဒီနေ့မနက်ပိုင်းမှာ ခုနစ်နာရီအတွင်း နှစ်ကြိမ်တိုင်တိုင်လှုပ်ခတ်သွားတယ်လို့ မိုးလေဝသနဲ့ဇလဗေဒညွှန်ကြားမှုဦးစီးဌာနက ထုတ်ပြန်ပါတယ်။
အဲဒီပထမငလျင်တခုဟာ ဒီနေ့မနက် ၁၀ နာရီ ၄၀ မိနစ်အချိန်ကလှုပ်ခဲ့တာဖြစ်ပြီး ကာမိုင်းမြို့ရဲ့အနောက်ဘက် ၁၃မိုင်လောက်အကွာကို ဗဟိုပြုခဲ့တာပါ။
အင်အားကတော့ ရစ်ချ်တာစကေး ၄.၅ အဆင့်ရှိပြီး မြေအနက် ၁၀ ကီလိုမီတာမှာ လှုပ်ရှားသွားတာဖြစ်တယ်လို့သိရပါတယ်။
ဒါ့အပြင် ဒီနေ့မနက်အစောပိုင်း ၃ နာရီဝန်းကျင်မှာလည်း မအူပင်မြို့အနီးမှာ ငလျင်တခုလှုပ်ခဲ့ပါသေးတယ်။
မအူပင်မြို့ရဲ့ အရှေ့မြောက်ဘက် ၉ မိုင်လောက်အကွာကို ဗဟိုပြုခဲ့တာဖြစ်ပြီး အင်အားရစ်ချ်တာစကေး ၃.၈ အဆင့်ရှိကာ မြေအနက် ၁၆ ကီလိုမီတာမှာ လှုပ်ရှားသွားခဲ့တာပါ။
အခုလှုပ်သွားတဲ့ ငလျင်နှစ်ခုစလုံးဟာ အင်အားအနည်းငယ်ရှိတဲ့ အဆင့်တွေပဲဖြစ်ပေမယ့် မြို့တွေနဲ့ နီးနီးနားနားမှာ ဗဟိုပြုခဲ့တာကြောင့် ဒေသခံအချို့ကတော့ သိသိသာသာကို ခံစားခဲ့ရပါတယ်။
ဒါပေမယ့် လက်ရှိအချိန်အထိတော့ ဒီငလျင်တွေကြောင့် ထိခိုက်ပျက်စီးတာမျိုး ဒါမှမဟုတ် လူထိခိုက်တဲ့သတင်းတွေတော့ မကြားရသေးပါဘူး။
မြန်မာနိုင်ငံမှာ အခုရက်ပိုင်းအတွင်း ငလျင်တွေ ခဏခဏ လှုပ်နေတာကြောင့် ပြည်သူတွေအနေနဲ့လည်း သတိနဲ့ နေထိုင်ကြဖို့ကိုလည်း အသိပေးထားပါတယ်။
