Border News Agency
ထိုင်း၊ မေ ၅။
ထိုင်းနိုင်ငံ၊ ချင်းမိုင်ခရိုင်၊ မယ်ရင်မြို့နယ်မှာ အလုပ်ရှင်ဖြစ်သူကို ဓားနဲ့ထိုးသတ်ပြီး ထွက်ပြေးသွားတဲ့ မြန်မာလုပ်သားလေးဦးကို မေလ ၂ ရက်နေ့က ချင်းရိုင်နယ်စပ်မှာ ထိုင်းရဲတပ်ဖွဲ့က ဖမ်းဆီးရမိခဲ့ပါတယ်။
အလုပ်ရှင်ဖြစ်သူ အသက် ၄၉ နှစ်အရွယ် ဦးဆွန်ချိုင်းဟာအိပ်ပျော်နေတုန်းမှာ အခုလို အသတ်ခံခဲ့ရတာပါ။
အဲဒီဖမ်းဆီးခံရသူတွေရဲ့ ထွက်ဆိုချက်အရ အလုပ်ရှင်ဟာ လုပ်အားခတွေကို ပုံမှန်မပေးဘဲ တောင်းတဲ့အခါမှာလည်း အမြဲငြင်းဆိုလေ့ရှိတာကြောင့် စိတ်မထိန်းနိုင်ဘဲအခုလို စုပေါင်းကြံစည် သတ်ဖြတ်ခဲ့တာဖြစ်တယ်လို့ ဝန်ခံထားပါတယ်။
ဒါ့အပြင် ဘန်ကောက်မှာလည်း အမေရိကန်နိုင်ငံသားတဦးကို သတ်ဖြတ်ခဲ့တဲ့ မြန်မာလုပ်သားလေးဦး ဖမ်းဆီးခံခဲ့ရပါသေးတယ်။
အဲဒီသေဆုံးသူက တရားခံတစ်ဦးရဲ့ ညီမဖြစ်သူကို နှောင့်ယှက်စော်ကားခဲ့တာကြောင့် လက်စားချေတဲ့အနေနဲ့ ဝိုင်းဝန်းတိုက်ခိုက်ခဲ့ကြတာပါ။
အဲဒီတရားခံအားလုံးကို ထိုင်းဥပဒေအရ အရေးယူနိုင်ဖို့ သက်ဆိုင်ရာရဲစခန်းတွေကို လွှဲပြောင်းပေးထားပါတယ်။
