Border News Agency
မြောက်ဦး၊စက်တင်ဘာ ၂၈။
ကပ္ပလီပင်လယ်နဲ့ မြန်မာနိုင်ငံတောင်ပိုင်းကမ်းရိုးတန်းအနီးမှာဖြစ်ပေါ်နေတဲ့ လေဖိအားနည်းရပ်ဝန်းဟာ မုန်တိုင်းငယ်အဆင့်ကိုရောက်ရှိလာပြီး အာရက္ခဒေသမှာ နေရာကွက်ပြီး မိုးကြီးတာ၊လေပြင်းတိုက်ခတ်တာနဲ့ လှိုင်းကြီးတာတွေဖြစ်ပေါ်လာနိုင်တယ်လို့ အမျိုးသားညီညွတ်ရေးအစိုးရ၊လူသားချင်းစာနာထောက်ထားရေးနဲ့ ဘေးအန္တရာယ်ဆိုင်ရာစီမံခန့်ခွဲရေးဝန်ကြီးဌာနက စက်တင်ဘာလ ၂၈ ရက်၊ဒီနေ့သတိပေးထုတ်ပြန်ပါတယ်။
အဲဒီမုန်တိုင်းငယ်ဟာမြောက်-အနောက်မြောက်ဘက်ကို ဆက်လက်ရွေ့လျားရင်း မြန်မာ-ဘင်္ဂလားဒေ့ရှ် ကမ်းရိုးတန်းအနီးကနေတဆင့် ဘင်္ဂလားပင်လယ်အော်အရှေ့မြောက်ပိုင်းနဲ့ ဘင်္ဂလားဒေ့ရှ်နိုင်ငံဘက်ကို ဦးတည်ရွေ့လျားသွားမှာပါ။
မုန်တိုင်းငယ်ရဲ့အရှိန်ကြောင့် အာရက္ခဒေသအပါအဝင်တနင်္သာရီ၊ မွန်၊ ကရင်၊ ကရင်နီ၊ ပဲခူး၊ ရန်ကုန်၊ ဧရာဝတီ၊ မကွေး၊ စစ်ကိုင်းနဲ့ မန္တလေးတို့မှာ မိုးသည်းထန်စွာရွာသွန်းနိုင်ပြီး အထူးသဖြင့်အာရက္ခဒေသမှာ မိုးကြီးတာ၊ လေပြင်းတိုက်ခတ်တာ၊ လျှပ်စီးလက်တာနဲ့ မိုးကြိုးပစ်တာတွေ ဖြစ်ပေါ်နိုင်ပါတယ်။
ပင်လယ်ပြင်နဲ့ ကမ်းရိုးတန်းတွေမှာ အမြင့်ဆုံးလေတိုက်နှုန်း တနာရီကို ၃၅ မိုင်ကနေ မိုင် ၄၀ အထိတိုက်ခတ်နိုင်ပြီး လှိုင်းကြီးနိုင်တာကြောင့် ရေလုပ်ငန်းတွေကို ခေတ္တရပ်နားထားဖို့ အသိပေးထားပါတယ်။
အာရက္ခဒေသအတွင်းရှိ မြေနိမ့်ပိုင်းနဲ့ရေလွှမ်းမိုးလေ့ရှိတဲ့ ဒေသတွေမှာနေထိုင်သူတွေအနေနဲ့ လျှပ်တပြက်ရေလွှမ်းမိုးမှုအန္တရာယ်နဲ့ မြေပြို၊ ကမ်းပြိုမှုတွေကို အထူးသတိပြုကြဖို့လည်း MoSOHAR က တိုက်တွန်းထားပါတယ်။
