Border News Agency
အီရန်၊မေ ၁၅။
အီရန်အစိုးရဟာဟောမုဇ်ရေလက်ကြားအတွင်း တရုတ်သင်္ဘောအချို့ကို ဖြတ်သန်းသွားလာခွင့် စတင်ပြုလုပ်ပေးနေပြီလို့အီရန်အခြေစိုက် Fars သတင်းဌာနက မေလ ၁၄ ရက်နေ့မှာ ဖော်ပြပါတယ်။
အမေရိကန်သမ္မတထရမ့်ရဲ့ တရုတ်နိုင်ငံခရီးစဉ်အတွင်း ရေလက်ကြားကို လွတ်လပ်စွာ ဖြတ်သန်းနိုင်ရေးအတွက် သမ္မတရှီကျင့်ဖျင်နဲ့ သဘောတူညီချက်ရပြီးနောက်မှာ အခုလို သတင်းထွက်ပေါ်လာတာဖြစ်ပါတယ်။
ဒီလိုခွင့်ပြုပေးတာဟာ တရုတ်နိုင်ငံခြားရေးဝန်ကြီးနဲ့ သံအမတ်တို့ရဲ့ တောင်းဆိုမှုကြောင့်ဖြစ်ပြီး နှစ်နိုင်ငံ ဗျူဟာမြောက် မိတ်ဖက်ဖြစ်မှုအရ အီရန်က လိုက်လျောပေးခဲ့တာပါ။
အီရန်ဟာ ပြီးခဲ့တဲ့ ဖေဖော်ဝါရီလ ၂၈ ရက်နေ့က အမေရိကန်နဲ့ အစ္စရေးတို့ရဲ့ တိုက်ခိုက်မှုကို ခံရပြီးနောက်ပိုင်း ဒီရေလမ်းကြောင်းကို တင်းတင်းကျပ်ကျပ် ပိတ်ဆို့ထားခဲ့တာ ဖြစ်ပါတယ်။
ဧပြီလဆန်းမှာ အပစ်အခတ်ရပ်စဲရေး သဘောတူခဲ့ပေမယ့်အီရန်ဆိပ်ကမ်းတွေကို အမေရိကန်က ဆက်လက်ပိတ်ဆို့ထားတာကြောင့် ကမ္ဘာ့ရေနံနဲ့ သဘာဝဓာတ်ငွေ့ ငါးပုံတပုံကျော် ဖြတ်သန်းရာ ဒီရေလမ်းကြောင်းမှာ အကျပ်အတည်းတွေ ဆက်ဖြစ်နေခဲ့တာပါ။
အခု အီရန်ရဲ့ လုပ်ဆောင်ချက်ကြောင့် မြေပြင်အခြေအနေ ဘယ်လောက်ပြောင်းလဲသွားမလဲဆိုတာတော့ ရှင်းရှင်းလင်းလင်း မသိရသေးပါဘူး။
အီရန်ဘက်ကတော့ စစ်ပွဲကာလအတွင်းမှာကတည်းက တရုတ်နဲ့ ဆက်နွှယ်တဲ့ သင်္ဘောတွေအနေနဲ့ အီရန်လက်နက်ကိုင်တပ်ဖွဲ့တွေနဲ့ ကြိုတင်ညှိနှိုင်းရင် ဖြတ်သန်းလို့ရတယ်လို့ အရိပ်အမြွက် ပြောထားဖူးပါတယ်။
မေလ ၁၃ ရက်နေ့မှာတော့ အီရတ်ရေနံစိမ်း စည်ပေါင်း ၂ သန်း တင်ဆောင်လာတဲ့ တရုတ်စူပါသင်္ဘောတစင်းဟာ ရေလက်ကြားကို ဖြတ်သန်းသွားနိုင်ခဲ့ပြီ ဖြစ်ပါတယ်။
အဲဒီတရုတ်သင်္ဘောဟာ အမေရိကန်နဲ့ အီရန် စစ်ပွဲကြောင့် ပင်လယ်ကွေ့အတွင်းမှာ နှစ်လကျော်ကြာ သောင်တင်နေခဲ့ရတာဖြစ်ကြောင်း သင်္ဘောခြေရာခံအချက်အလက်တွေအရ သိရပါတယ်။
ဒီလုပ်ဆောင်ချက်ဟာ တရုတ်နဲ့ အမေရိကန်ခေါင်းဆောင်တွေကြားက ဆွေးနွေးမှုတွေရဲ့ ရလဒ်တခုလို့လည်း ရှုမြင်နေကြပါတယ်။
အီရန်ရဲ့ အခုလို တရုတ်သင်္ဘောတွေကို ဖြတ်သန်းခွင့်ပေးလိုက်တာဟာ ကမ္ဘာ့စွမ်းအင်ဈေးကွက်နဲ့ ဒေသတွင်း တင်းမာမှုတွေ လျော့ကျစေဖို့အတွက် အပေါင်းလက္ခဏာဆောင်တဲ့ ခြေလှမ်းသစ်တခု ဖြစ်လာနိုင်ပါတယ်။
