Border News Agency
အမေရိကန်၊ မေ ၁၆။
ကမ္ဘာလုံးဆိုင်ရာ ISIL (ISIS)အကြမ်းဖက်အဖွဲ့ရဲ့ ဒုတိယခေါင်းဆောင်ဖြစ်သူ အဘူဘီလယ်လ်အယ်လ်မီနူကီ ဟာ အမေရိကန်နဲ့နိုင်ဂျီးရီးယားပူးပေါင်းတပ်ဖွဲ့တွေရဲ့စစ်ဆင်ရေးတခုအတွင်း အသေပစ်ခတ်ရှင်းလင်းတာခံလိုက်ရတယ်လို့ အမေရိကန်သမ္မတဒေါ်နယ်ထရမ့်က ပြောပါတယ်။
သမ္မတထရမ့်က သူတို့ရဲ့ Truth Social လူမှုကွန်ရက်စာမျက်နှာမှာ သွေးသောက်ရဲရင့်တဲ့ အမေရိကန်တပ်ဖွဲ့တွေနဲ့ နိုင်ဂျီးရီးယားတပ်မတော်တို့ပူးပေါင်းပြီး အလွန်ရှုပ်ထွေးပြီး စနစ်တကျစီစဉ်ထားတဲ့စစ်ဆင်ရေးကို အောင်မြင်စွာဆောင်ရွက်နိုင်ခဲ့တာဖြစ်တယ်လို့ မေလ ၁၅ ရက်နေ့ကရေးသားခဲ့တာပါ။
အဲဒီအသတ်ခံရသူ အဘူဘီလယ်လ်ဟာ အာဖရိကဒေသမှာပုန်းအောင်းနေခဲ့တာဖြစ်ပြီး သူဟာ ၂၀၂၃ ခုနှစ်ကတည်းက အမေရိကန်အစိုးရရဲ့ ကမ္ဘာ့အန္တရာယ်အရှိဆုံးအကြမ်းဖက်သမားစာရင်းမှာထည့်သွင်းကာ ပိတ်ဆို့အရေးယူမှုခံထားရသူတဦးလည်း ဖြစ်ပါတယ်။
အမေရိကန်နိုင်ငံခြားရေးဝန်ကြီးဌာနရဲ့ အဆိုအရ သူဟာ ဆာဟေလ် (Sahel) ဒေသအခြေစိုက် ISIS ထိပ်တန်းခေါင်းဆောင်တဦးဖြစ်ပြီး ကမ္ဘာတဝှမ်းကအကြမ်းဖက်လုပ်ငန်းတွေအတွက် ရန်ပုံငွေနဲ့စစ်ရေးလမ်းညွှန်ချက်တွေပေးနေတဲ့ အဓိကတာဝန်ရှိသူ ဖြစ်ပါတယ်။
အမေရိကန်အစိုးရဟာ ပြီးခဲ့တဲ့နှစ်ခရစ္စမတ်နေ့ကလည်း နိုင်ဂျီးရီးယားနိုင်ငံအတွင်း လေကြောင်းတိုက်ခိုက်မှုပြုလုပ်ခဲ့ဖူးပြီး လက်ရှိမှာတော့အကြမ်းဖက်နှိမ်နင်းရေးအတွက် နည်းပညာနဲ့ထောက်လှမ်းရေးသတင်းအပြန်အလှန်မျှဝေဖို့ ရာနဲ့ချီတဲ့တပ်ဖွဲ့ဝင်တွေကို စေလွှတ်ထားတယ်လို့သိရပါတယ်။
