Botder News Agency
ဘန်ကောက်၊မေ ၁၇။
ဘန်ကောက်မှာ မေလ ၁၆ ရက်က ဖြစ်ပွားခဲ့တဲ့ ရထားနဲ့ဘတ်စ်ကားတိုက်မှုကြောင့် လူ ၈ ဦးသေဆုံးပြီး ၁၅ ဦး ဒဏ်ရာရခဲ့တဲ့ ဖြစ်စဉ်အတွက် သေဆုံးသူတဦးကိုအာမခံကြေး ဘတ် ၁.၅ သန်းအထိ ပေးမယ်လို့ ဘန်ကောက်သယ်ယူပို့ဆောင်ရေးအာဏာပိုင်အဖွဲ့ (BMTA) က ထုတ်ပြန်ပါတယ်။
ဒါ့အပြင် BMTA ဘက်ကနေလည်း သေဆုံးသူမိသားစုတွေအတွက် တဦးကို ထိုင်းဘတ် ၃၀,၀၀၀ ကနေ ၅၀,၀၀၀ အထိ အပိုဆောင်း ထောက်ပံ့ပေးသွားမှာဖြစ်ပြီး ဒဏ်ရာရသူတွေကိုတော့ ဆေးဝါးကုသစရိတ်အပေါ် မူတည်ပြီး လျော်ကြေးပြန်ပေးမယ်လို့ သိရပါတယ်။
ယာဉ်တိုက်မှုဖြစ်ရတာဟာ အဲဒီအချိန်မှာ လမ်းပိတ်ဆို့မှု အကြီးအကျယ်ဖြစ်နေလို့ ဘတ်စ်ကားက ရှေ့တိုးနောက်ဆုတ်လုပ်မရဘဲ ရထားလမ်းကြောင်းပေါ် ခွလျက်သား မီးပွိုင့်မိနေစဉ် ရထားဝင်တိုက်ခဲ့တာဖြစ်ပြီး ကားမီးလောင်မှုအထိ ဖြစ်ပွားခဲ့တာပါ။
အဲဒီ ရထားလမ်းဆုံတွေမှာ အခုလို ကားတွေ ညှပ်ပြီး ပိတ်မိနေတတ်တဲ့ အန္တရာယ်ရှိတဲ့ အခြေအနေတွေကို အာဏာပိုင်တွေဘက်က ဘယ်လိုကိုင်တွယ် ဖြေရှင်းမလဲဆိုတာနဲ့ ပတ်သက်ပြီး ပြည်သူတွေကြား ဝေဖန်စိုးရိမ်မှုတွေ ထွက်ပေါ်နေပါတယ်။
