Border News Agency
အမေရိကန်၊ဇူလိုင် ၂။
အမေရိကန်မြေပေါ်မှာမွေးဖွားလာသူတိုင်းကို အလိုအလျောက် နိုင်ငံသားဖြစ်ခွင့်ပေးတဲ့ ရာစုနှစ်ချီကျင့်ထုံးကို ပယ်ဖျက်ဖို့ သမ္မတ ဒေါ်နယ်ထရမ့်ရဲ့ ကြိုးပမ်းမှုကို အမေရိကန်တရားရုံးချုပ်က ဇူလိုင်လ ၁ ရက်နေ့မှာပယ်ချလိုက်ပါတယ်။
တရားသူကြီးခြောက်ဦးနဲ့ ဆုံးဖြတ်ခဲ့တဲ့ ဒီစီရင်ချက်ဟာ လူဝင်မှုကြီးကြပ်ရေးမူဝါဒကို အကြီးအကျယ် ပြောင်းလဲပစ်ဖို့ ကြိုးစားနေတဲ့ သမ္မတထရမ့်အတွက်တော့ အတော်လေးကို အထိနာသွားစေတဲ့ ထိုးနှက်ချက်တခု ဖြစ်လာခဲ့တာပါ။
ဒေါ်နယ်ထရမ့်ဟာ ၂၀၂၅ ခုနှစ်၊ဇန်နဝါရီလမှာ ရာထူးတက်လာပြီးပြီးချင်းပဲ တရားမဝင် နေထိုင်သူတွေနဲ့ ယာယီဗီဇာသမားတွေက မွေးဖွားလာတဲ့ ကလေးတွေကို အလိုအလျောက် နိုင်ငံသားပေးတဲ့စနစ် ပိတ်ပင်ဖို့ သမ္မတအမိန့်တရပ်ကို လက်မှတ်ရေးထိုးခဲ့တာ ဖြစ်ပါတယ်။
အမေရိကန်ပြည်တွင်းစစ်အပြီး ၁၈၆၈ ခုနှစ် ကျေးကျွန်စနစ်အဆုံးသတ်ချိန်ကတည်းက ပြဋ္ဌာန်းခဲ့တဲ့ အခြေခံဥပဒေ ပြင်ဆင်ချက်အမှတ် ၁၄ အရ အမေရိကန်မြေပေါ်မှာ မွေးဖွားလာသူတိုင်းဟာ နိုင်ငံသားဖြစ်ခွင့်ရှိတယ်ဆိုတဲ့ ကတိကဝတ်ကိုဆက်ပြီး ထိန်းသိမ်းလိုက်တယ်လို့ တရားရုံးချုပ် တရားသူကြီးချုပ် ဂျွန်ရောဘတ်စ်က ပြောကြားခဲ့ပါတယ်။
သမ္မတထရမ့်ဘက်ကတော့ ဒီမွေးရာပါနိုင်ငံသားဖြစ်ခွင့်စနစ်ဟာ တရားမဝင် ရွှေ့ပြောင်းနေထိုင်သူတွေကို အမေရိကန်ရဲ့ လူမှုဖူလုံရေးစနစ်ကနေ အခွင့်ကောင်းယူခွင့် ပေးထားသလိုဖြစ်နေပြီး အခွန်ထမ်းပြည်သူတွေရဲ့ ငွေတွေကို ခေါင်းပုံဖြတ်နေတာလို့ စောဒကတက်ခဲ့တာပါ။
ဒါပေမယ့်လည်း တရားရုံးချုပ်ကတော့ ထရမ့်ရဲ့ စောဒကတက်မှုတွေကို ပယ်ချခဲ့ပြီး ဇူလိုင်လ ၄ ရက် အမေရိကန်လွတ်လပ်ရေးနေ့ မတိုင်ခင်လေးမှာပဲ ယခုလို သမိုင်းဝင် ဆုံးဖြတ်ချက်ကို ချမှတ်ပေးခဲ့တာ ဖြစ်ပါတယ်။
