Border News Agency
ရန်ကုန်၊ ဇူလိုင် ၁၃။
မြန်မာစစ်တပ်ဖမ်းဆီးထားတဲ့ နိုင်ငံတော်အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်အပါအဝင် နိုင်ငံရေးအကျဉ်းသားအားလုံးကို ပြန်လွှတ်ပေးဖို့ အာဆီယံနိုင်ငံခြားရေးဝန်ကြီးတွေ တောင်းဆိုလိုက်ပါတယ်။
ထိုင်းနိုင်ငံ၊ ဘန်ကောက်မြို့မှာ ဇူလိုင်လ ၁၂ ရက်နေ့ပြုလုပ်တဲ့ အာဆီယံနိုင်ငံခြားရေးဝန်ကြီးတွေနဲ့ အာဏာသိမ်းစစ်တပ်နိုင်ငံခြားရေးဝန်ကြီးတွေ့ဆုံပွဲမှာ တောင်းဆိုတာဖြစ်ပြီး အာဆီယံဘုံသဘောတူညီချက်ငါးချက်ဟာလည်း ဆက်သက်ဝင်နေတယ်လို့ အတည်ပြုခဲ့ကြပါတယ်။
မြန်မာ့အရေးမှာ ထင်သာမြင်သာရှိတဲ့ တိုးတက်မှုတွေကို မြင်တွေ့လိုပြီး အရပ်သားတွေအပေါ် အကြမ်းဖက်မှုတွေ အပြီးတိုင်ရပ်တန့်ဖို့၊ နိုင်ငံရေးအကျဉ်းသားတွေလွှတ်ပေးဖို့နဲ့ AHA Centre ရဲ့ လူသားချင်းစာနာမှုအကူအညီတွေကို နေရာအနှံ့ပေးပို့ခွင့်ပြုဖို့အဓိကလိုလားနေတာပါ။
အဲဒီအပြင် မြန်မာ့အကျပ်အတည်းကိုငြိမ်းချမ်းပြီး ရေရှည်တည်တံ့တဲ့ နည်းလမ်းနဲ့ဖြေရှင်းနိုင်ဖို့အတွက် သက်ဆိုင်သူအားလုံးအကြား အပြုသဘောဆောင်တဲ့ တွေ့ဆုံဆွေးနွေးမှုတွေ ဖြစ်လာဖို့လည်း မျှော်လင့်နေကြပါတယ်။
ဒီတောင်းဆိုမှုတွေအပေါ် အာဏာသိမ်းစစ်တပ်က ဒေါ်အောင်ဆန်းစုကြည်ကို ဆွေမျိုးအစ်မလိုမျိုး စောင့်ရှောက်ထားပြီး ကျန်းမာရေးကောင်းမွန်ကြောင်းသာ တုံ့ပြန်ပြောဆိုသွားပါတယ်။
