Border News Agency
သံတွဲ၊ ဩဂုတ် ၁၆။
အာရက္ခတပ်တော်(AA)ထိန်းချုပ်ထားတဲ့ သံတွဲမြို့ကို အာဏာသိမ်းစစ်တပ်လေကြောင်းတိုက်ခိုက်လို့ အရပ်သားနှစ်ဦးသေဆုံးပြီး ကလေးငယ်အပါအဝင်သုံးဦးဒဏ်ရာရသွားပါတယ်။
အဲဒီသံတွဲမြို့ အမှတ် ၈/က ရပ်ကွက်၊ ၂ လမ်းရှိ ဖိုးဇီဝဆေးဆိုင်အနောက်ဘက်နေရာကို ဩဂုတ်လ ၁၆ရက်၊ ဒီနေ့မနက်က အာဏာသိမ်းစစ်တပ်လေကြောင်းတိုက်ခိုက်ခဲ့တာပါ။
အဲဒီလိုတိုက်ခိုက်ခဲ့တာကြောင့် အသက်ငါးဆယ်အရွယ် ဦးမင်းနောင်နဲ့ သမီးဖြစ်သူ အသက်ဆယ့်လေးနှစ်အရွယ် ချွန်းလဲ့ရွှေရည်သေဆုံးသွားပြီး အသက်နှစ်နှစ်အရွယ် ရွှေမိုးယဲသော်၊ အသက်လေးဆယ်ငါးနှစ်အရွယ် ဇေယျာမင်းလွင်နဲ့ အသက်လေးဆယ်အရွယ် ဌေးဌေးမော် ဒဏ်ရာရသွားကြပါတယ်။
အာဏာသိမ်းစစ်တပ်ဟာ ခုရက်ပိုင်းအတွင်း သံတွဲမြို့နယ်ကိုလေကြောင်းတိုက်ခိုက်တာတွေပိုလုပ်လာတာကြောင့် ပြည်သူတွေအနေနဲ့ အာဏာသိမ်းစစ်တပ်ရဲ့ လေကြောင်းနဲ့ ရေကြောင်းအန္တရာယ်ကိုသတိထားကြဖို့ အာရက္ခတပ်တော်ကထပ်ပြီးအသိပေးထားပါတယ်။
