Border News Agency
မြောက်ဦး၊ စက်တင်ဘာ ၁။

မြန်မာနိုင်ငံမှာအမျိုးသမီးတွေဟာ အခကြေးငွေမရတဲ့ အိမ်တွင်းပြုစုစောင့်ရှောက်ရေးတာဝန်တွေကို အမျိုးသားတွေထက်နှစ်ဆနီးပါးပိုမိုထမ်းဆောင်နေရတယ်လို့ ကုလသမဂ္ဂဖွံ့ဖြိုးမှုအစီအစဉ် (UNDP) နဲ့ ကုလသမဂ္ဂအမျိုးသမီးများအဖွဲ့ (UN Women) တို့ရဲ့ သုတေသနအစီရင်ခံစာအသစ်မှာ ဖော်ပြထားပါတယ်။

ကလေးထိန်းတာ၊သက်ကြီးရွယ်အိုနဲ့ လူမမာပြုစုတာ၊ချက်ပြုတ်လျှော်ဖွပ်တာစတဲ့ အိမ်ထောင်မှုကိစ္စတွေအတွက် အမျိုးသမီးတွေဟာတနေ့ကို အချိန်အများကြီးပေးနေရပေမဲ့ ဘာအခကြေးငွေမှ မရကြပါဘူး။

ခု​လက်ရှိကြုံတွေ့နေရတဲ့ စီးပွားရေးအကျပ်အတည်းတွေနဲ့ ကုန်ဈေးနှုန်းတက်တာတွေကြောင့်လည်း ဒီဝန်ထုပ်ဝန်ပိုးဟာ ပိုပြီးကြီးမားလာတာပါ။

အဲဒီအပြင်မိသားစုစားဝတ်နေရေးခက်ခဲလာချိန်မှာ အိမ်ထောင်ရှင်မတွေဟာ အိမ်တွင်းစီမံခန့်ခွဲဖို့နဲ့ ပြုစုစောင့်ရှောက်ဖို့ အချိန်နဲ့အင်အားကို အရင်ကထက်ပိုစိုက်ထုတ်နေရတယ်လို့ ဆိုပါတယ်။

​ဒီလိုအခကြေးငွေမရတဲ့ အိမ်တွင်းတာဝန်တွေကိုပဲပိနေတာကြောင့် အမျိုးသမီးတွေမှာ ပြင်ပအလုပ်အကိုင်ဝင်ရောက်ခွင့်နဲ့ ကိုယ်ပိုင်ဝင်ငွေရှာနိုင်တဲ့ အခွင့်အလမ်းတွေဆုံးရှုံးနေရပါတယ်။

ကိုယ်ပိုင်တိုးတက်ရေး၊ပညာသင်ယူရေးနဲ့ လူမှုရေးလုပ်ငန်းတွေမှာ ပါဝင်ဖို့အချိန်မရှိတော့ဘဲ စီးပွားရေးအရ အခြားသူကိုမှီခိုနေရသူတွေအဖြစ် ကျန်ရစ်နေရတာပါ။

​အဲဒီအပြင်အနားယူချိန်နည်းပါးပြီး စိတ်ဖိစီးမှုတွေကြား လုပ်အားပေးနေရလို့ အမျိုးသမီးတွေရဲ့ ရုပ်ပိုင်း၊ စိတ်ပိုင်းဆိုင်ရာကျန်းမာရေးတွေပါ ထိခိုက်လာရပါတယ်။

ဒါပေမယ့်လူအဖွဲ့အစည်းက ဒီပေးဆပ်မှုတွေကို မဖြစ်မနေလုပ်ရမယ့်တာဝန်တခုလိုပဲ သာမန်သဘောထားကြလို့ အမျိုးသမီးတွေရဲ့လုပ်အားဟာ အသိအမှတ်ပြုမခံရသေးပါဘူး။

​ဒါကြောင့် အခကြေးငွေမရတဲ့ပြုစုစောင့်ရှောက်ရေးအလုပ်တွေကို အမျိုးသားတွေပါ မျှဝေထမ်းဆောင်ကြဖို့ UN က တိုက်တွန်းထားပါတယ်။

အမျိုးသမီးတွေရဲ့ အိမ်တွင်းလုပ်အားကို တန်ဖိုးထားအသိအမှတ်ပြုပေးပြီး ဝန်ထုပ်ဝန်ပိုးတွေကို လျှော့ချပေးမှသာ အမျိုးသမီးတွေရဲ့လူမှုစီးပွားဘဝနဲ့ တန်းတူညီမျှခွင့်တွေ တိုးတက်လာမှာဖြစ်ပါတယ်။