Border News Agency
ရန်ကုန်၊ စက်တင်ဘာ ၁။
ရန်ကုန်တိုင်း၊ကမာရွတ်မြို့နယ်၊အမှတ် ၅ ရပ်ကွက်မှာ ငွေကျပ်သိန်း ၁,၀၀၀ တန်ဖိုးရှိတဲ့ စိတ်ကြွဆေးပြား ၅၀,၀၀၀ ကို လူတစ်ဦးထံကနေသိမ်းဆည်းရမိခဲ့တယ်လို့ မူးယစ်ဆေးဝါးတားဆီးကာကွယ်ရေးဗဟို(CCDAC) က စက်တင်ဘာလ ၁ ရက်၊ ဒီနေ့ထုတ်ပြန်ပါတယ်။
အဲဒီမူးယစ်ဆေးဝါးတားဆီးနှိမ်နင်းရေး ရဲတပ်ဖွဲ့ပါဝင်တဲ့ပူးပေါင်းအဖွဲ့ဟာ သတင်းအရ ပြီးခဲ့တဲ့ ဩဂုတ်လ ၂၉ ရက်၊ညနေ ၄ နာရီခွဲအချိန်မှာ စံပါယ်မာဃလမ်းအတိုင်း လမ်းလျှောက်လာသူကို သက်သေတွေနဲ့အတူ စစ်ဆေးရှာဖွေမှုတွေပြုလုပ်ခဲ့ကြတာဖြစ်ပါတယ်။
အဲဒီလိုစစ်ဆေးရာမှာ လမ်းလျှောက်လာသူ အောင်မျိုးမင်းဆီကနေ သိုဝှက်သယ်ဆောင်လာတဲ့ စိတ်ကြွဆေးပြား ၅၀,၀၀၀ နဲ့ လက်ကိုင်ဖုန်း ၁ လုံးတို့ကို ရှာဖွေတွေ့ရှိခဲ့ပါတယ်။
အဲဒီမူးယစ်ဆေးဝါးတွေနဲ့အတူ ဖမ်းဆီးရမိသူ အသက် ၃၈ နှစ်အရွယ် အောင်မျိုးမင်းကို ကမာရွတ်မြို့မရဲစခန်းမှာ မူးယစ်ဆေးဝါးနှင့် စိတ်ကိုပြောင်းလဲစေသောဆေးဝါးများဆိုင်ရာဥပဒေနဲ့ အမှုဖွင့် အရေးယူထားပါတယ်။
အဲဒီမူးယစ်ဆေးဝါးသယ်ဆောင်မှုနဲ့ ပတ်သက်တဲ့ ပါဝင်ပတ်သက်သူတွေနဲ့ ကွင်းဆက်တွေကို ဆက်လက်ဖော်ထုတ်နေတယ်လို့လည်း ဆိုပါတယ်။
