Border News Agency
ပုဏ္ဏားကျွန်း၊ စက်တင်ဘာ ၁၃။
အာရက္ခတပ်တော်(AA)ထိန်းချုပ်ထားတဲ့ ပုဏ္ဏားကျွန်းမြို့နယ်ကို အာဏာသိမ်းစစ်တပ်ပြန်သိမ်းဖို့ကြိုးစားနေသလို အာဏာသိမ်းစစ်တပ်ထိန်းချုပ်ထားတဲ့ စစ်တွေကိုသိမ်းဖို့ အာရက္ခတပ်တော်တန်ပြန်ထိုးစစ်ဆင်နေတယ်လို့ မြေပြင်စစ်ရေးသတင်းရင်းမြစ်တွေက အတည်ပြုပြောကြပါတယ်။
အဲဒီပုဏ္ဏားကျွန်းမြို့နယ်၊စပါးထား၊အိုင်ဒင်၊ကွမ်းတောင်၊အောင်မြေကုန်း၊ခမောင်းတောစတဲ့ကျေးရွာတွေအနီးမှာ နှစ်ဘက်ရင်ဆိုင်တိုက်ပွဲတွေပြင်းထန်နေတာမို့ အာဏာသိမ်းစစ်တပ်က ကြည်း၊ရေ၊လေပူးပေါင်းပစ်ခတ်လမ်းရှင်းပြီး ပြန်သိမ်းဖို့ကြိုးစားနေတာပါ။
အဲဒီအာဏာသိမ်းစစ်တပ်ထိုးစစ်တွေကို အာရက္ခတပ်တော်က အင်အားအလုံးအရင်းနဲ့တန်ပြန်ထိုးစစ်ဆင်တိုက်ခိုက်ပြီး စစ်တွေမြို့နယ်မှာ ခြေကုပ်ယူရှေ့တိုးဖို့ကြိုးစားနေတာလို့ မြေပြင်စစ်ရေးသတင်းရင်းမြစ်တွေက ဆိုကြပါတယ်။
“တပ်တော်ကလည်း လက်နက်ခဲယမ်းစစ်သည်အင်အားဖြည့်ပြီး တန်ပြန်ထိုးစစ်ဆင်နေပါတယ်။ စစ်တပ်အင်အားနည်းတဲ့နေရာကထိုးဖောက်ဝင်ရောက်ဖို့တန်ပြန်ထိုးစစ်ဆင်နေတာပါ။ နှစ်ဘက်အပြန်အလှန်ထိုးစစ်ကတော့တအားပြင်းနေပါတယ်။ နှစ်ဘက်စလုံးဒရုန်းတွေအများကြီးသုံးလာကြပါတယ်။”လို့ မြေပြင်စစ်ရေးသတင်းရင်းမြစ်တဦးက Border News Agency ကို ပြောပါတယ်။
အဲဒါကြောင့် နှစ်ဘက်သေဆုံးဒဏ်ရာရသူများနေကြတာမို့ နှစ်ဘက်စစ်သည်အင်အားဖြည့်ဆက်တိုက်နေကြပြီး နှစ်ဘက်ဒရုန်းတပ်ဖွဲ့တွေအဓိကအင်အားဖြည့်တိုက်ခိုက်နေကြတာလို့ မြေပြင်သတင်းရင်းမြစ်တွေက ဆိုကြပါတယ်။
အဲဒီပုဏ္ဏားကျွန်းတိုက်ပွဲမှာ အာဏာသိမ်းစစ်တပ်က အသေခံဒရုန်းတွေ၊FPV ဒရုန်းတွေအများအပြားအသုံးပြုတိုက်ခိုက်နေသလို အာရက္ခတပ်တော်ကလည်းဒရုန်းတပ်ဖွဲ့တွေအင်အားဖြည့်တင်းပြီး တန်ပြန်တိုက်ခိုက်နေတယ်လို့ မြေပြင်သတင်းရင်းမြစ်တွေကဆိုကြပါတယ်။
အဲဒီပုဏ္ဏားကျွန်းတိုက်ပွဲဟာ နှစ်ရက်ဆက်တိုင်းမနားတမ်းပစ်ခတ်တိုက်ခိုက်နေကြသလို ဆယ်ရက်နီးပါးရှိလာပြီမို့ နှစ်ဘက်သေဆုံးဒဏ်ရာရသူတွေရာချီရှိနိုင်တာမို့ စစ်သည်အင်အားအများဆုံးဖြည့်တင်းနိုင်ပြီး အများဆုံးအသေခံနိုင်သူတွေ အနိုင်ရသွားနိုင်တယ်လို့ မြေပြင်အခြေအနေကိုသိရှိထားကြတဲ့စစ်ရေးစောင့်ကြည့်လေ့လာနေကြသူတွေက ဆိုကြပါတယ်။
အဲဒါကြောင့် အာဏာသိမ်းစစ်တပ်က အာရက္ခတပ်တော်နောက်ခံအထိုင်နေရာတွေ၊အရေးကြီးနောက်တန်းထောက်ပို့နေရာတွေလို့ယူဆတဲ့နေရာတွေကို လေကြောင်းတိုက်ခိုက်တာတွေအပြင်းအထန်ပြုလုပ်ပေးနေတယ်လို့ မြေပြင်သတင်းရင်းမြစ်တွေက ဆိုကြပါတယ်။
“ပုဏ္ဏားကျွန်း၊ကျောက်တော်၊မြောက်ဦးဖက်တွေက နေရာတချို့ကို စစ်တပ်ကလေကြောင်းလာတိုက်သွားပါတယ်။ ညဥ့်တနာရီကျော်လူတွေအိပ်နေကြချိန်မှာပါ။ အသံတွေအကျယ်ကြီးဆက်တိုက်ကြားရပါတယ်။ ပေါက်ကွဲသံတွေလည်း ဆက်တိုက်ကြားရပါတယ်။”လို့ မြေပြင်စစ်ရေးသတင်းရင်းမြစ်တဦးက Border News Agency ကို ပြောပါတယ်။
အဲဒီပုဏ္ဏားကျွန်း-စစ်တွေအစပ်နေရာတွေမှာ အပြန်အလှန်ထိုးစစ်တွေပြင်းထန်နေသလို အပြန်အလှန်ခြေကုပ်ယူအထိုင်ချသိမ်းယူဖို့ကြိုးစားနေကြတာမို့ တိုက်ပွဲတွေနေ့စဥ်ရက်ဆက်ပြင်းထန်နေတယ်လို့ မြေပြင်စစ်ရေးသတင်းရင်းမြစ်တွေက ဆိုကြပါတယ်။
အဲဒီပုဏ္ဏားကျွန်းမြို့နယ်မှာ ခြေကုတ်ယူပြန်သိမ်းနိုင်ဖို့အတွက် အာဏာသိမ်းစစ်တပ်က အနည်းဆုံးစစ်ကြောင်းငါးကြောင်းထိုးနေတာဖြစ်ပြီး စစ်တွေ-ရန်ကုန်ကားလမ်းမကြီးအတိုင်း မင်းချောင်းတံတားမှကွမ်းတောင်ရွာထိုးစစ်ကို အဓိကအင်အားဖြည့်တိုက်ခိုက်နေတယ်လို့ မြေပြင်စစ်ရေးသတင်းရင်းမြစ်တွေက ဆိုကြပါတယ်။
အဲဒီအပြင် ကုလားတန်မြစ်ကြောင်းအတိုင်းဝင်ရောက်ကမ်းတက်ခြေကုပ်ယူနိုင်အောင် စပါးထား၊အိုင်ဒင်စတဲ့ကျေးရွာတွေကိုလည်း ပြန်သိမ်းယူဖို့ထိုးစစ်ဆင်နေသလို အောင်မြေကုန်း၊ခမောင်းတောစတဲ့ကျေးရွာတွေကိုလည်း အပြင်းအထန်ထိုးစစ်ဆင်နေတယ်လို့ မြေပြင်စစ်ရေးသတင်းရင်းမြစ်တွေက ဆိုကြပါတယ်။
အဲဒီပုဏ္ဏားကျွန်းမြို့နယ်တိုက်ပွဲသတင်းကို အာရက္ခတပ်တော်နဲ့အာဏာသိမ်းစစ်တပ်က တရားဝင်ထုတ်ပြန်တာမရှိသေးပေမယ့် အာဏာသိမ်းစစ်တပ်ရဲ့ဝါဒဖြန့်လူမှုကွန်ရက်တွေမှာ အာရက္ခတပ်တော်တပ်ဖွဲ့ဝင်အလောင်းတွေ၊လက်နက်ခဲယမ်းတွေသိမ်းဆည်းရမိတာတွေကို ထုတ်ပြထားကြပါတယ်။
အဲဒီအပြင် ပုစွန်တာတွေမှာ ရှေ့တန်းခံစစ်ကာကင်လုပ်ခုခံနေကြတဲ့အာရက္ခတပ်တော်တပ်ဖွဲ့ဝင်တွေကို ဒရုန်းသုံးတိုက်ခိုက်နေတာတွေကိုလည်း ထုတ်ပြထားကြပါတယ်။
အဲဒီပုဏ္ဏားကျွန်းမြို့နယ်တိုက်ပွဲတွေမှာ အာဏာသိမ်းစစ်တပ်ကကြည်းရေလေပူးပေါင်းပစ်ကူအားသာချက်ကို အဓိကအသုံးပြုနေသလို ဒရုန်းတွေလည်း အများကြီးအသုံးပြုတိုက်ခိုက်လာတာမို့ နှစ်ဘက်ကျဆုံးများပြီ တိုက်ပွဲတာရှည်နိုင်တယ်လို့ မြေပြင်စစ်ရေးသတင်းရင်းမြစ်တွေက ဆိုကြပါတယ်။
အဲဒီပုဏ္ဏားကျွန်းမြို့နယ်မှာ အာဏာသိမ်းစစ်တပ်ခြေကုပ်ယူအထိုင်ချနိုင်သွားရင် ပုဏ္ဏားကျွန်းမြို့နယ်ကတဆင့်ကျောက်တော်မြို့နယ်ကို ဆက်ထိုးစစ်ဆင်ပြန်သိမ်းယူပြီးကျောက်တော်ကတဆင့်ပလက်ဝမြို့နယ်ကို ထိုးစစ်ဆင်ပြန်သိမ်းယူမယ့်ကုလားတန်းစီမံကိန်းလမ်းကြောင်းရှင်းလင်းထိန်းချုပ်နယ်ဗျူဟာဖြစ်တယ်လို့ စစ်ရေးစောင့်ကြည်လေ့လာသူတွေက သုံးသပ်ထောက်ပြကြပါတယ်။
အဲဒီကုလားတန်ဘက်စုံသယ်ယူပို့ဆောင်ရေးစီမံကိန်းရဲ့စစ်တွေဆိပ်ကမ်းကို အာဏာသိမ်းစစ်တပ်ကထိန်းချုပ်ထားပြီး ကုလားတန်စီမံကိန်းလမ်းကြောင်းတလျှောက်ကုလားတန်မြစ်ကြောင်းကို အာရက္ခတပ်တော်ထိန်းချုပ်ထားပါတယ်။
