Border News Agency
ဆော၊ အောက်တိုဘာ ၁၁။
ချင်းပြည်တောင်ပိုင်း၊ ကန်ပက်လက်မြို့ နယ်၊ ကျင်ဒွေးမြို့ကို ဝင်ရောက်နိုင်ဖို့ အာဏာသိမ်းစစ်တပ် အင်အားအလုံးအရင်းနဲ့ထိုးစစ်ဆင်နေပါတယ်။
အဲဒီကျင်ဒွေးမြို့ကို ပြန်ထိန်းချုပ်နိုင်ရေးအတွက် စက်တင်ဘာလကစတင်ပြီး လောင်းရှည်မြို့ကတဆင့် အင်အားအလုံးအရင်းနဲ့စတင်ထိုးစစ်ဆင်လာခဲ့တာဖြစ်ပြီး စစ်သည်အင်အားတထောင်ကျော်ထိ အသုံးပြုထိုးစစ်ဆင်နေတာပါ။
အဲဒီလောင်းရှည်ကိုခြေကုပ်ယူထားပြီး အမှတ် ၇၇ ခြေမြန်တပ်မလက်အောက်ခံ အာဏာသိမ်းစစ်သားတွေဟာ လေကြောင်းပစ်ကူနဲ့မြေပြင်လက်နက်ကြီးပစ်ကူတွေ အသုံးပြုပြီး အပြင်းအထန်ထိုးစစ်ဆင်နေကြပါတယ်။
အဲဒီအပြင် အမှတ် ၂၅ ကာကွယ်ရေးပစွည်းစက်ရုံကလည်း အင်အားထပ်ဖြည့်တင်းထားပြီး ဆွဲလွဲကျင်းနဲ့ မဆာတွီရွာတွေမှာ ရှေ့တန်းအခြေပြုစစ်ရေးလှုပ်ရှားမှုတွေကို ပိုလုပ်နေတယ်လို့ ဒေသတွင်းသတင်းရင်းမြစ်တွေဆီက ဆိုကြပါတယ်။
အဲဒီစစ်ကြောင်းထိုးရာ လမ်းကြောင်းတလျှောက်ကို အာဏာသိမ်းစစ်တပ်က နေ့စဉ်ရက်ဆက်လေကြောင်းတိုက်ခိုက်နေသလို လောင်းရှည်နယ်ကလည်း ဟောင်ဝှစ်ဇာ လက်နက်ကြီးတွေ ပစ်ကူပေးတိုက်ခိုက်နေပါတယ်။
အဲဒီအပြင်ဆောမြို့နယ်၊ကျောက်ထုဒေသ၊ကြီးရွာမြောက်ပိုင်းကိုလည်း လေကြောင်းတိုက်ခိုက်မှုတွေ ဆက်တိုက်လုပ်နေပြီး ဒေသခံပြည်သူတွေ စစ်ရေးအန္တရာယ်ကို အထူးသတိထားနေကြဖို့ တော်လှန်ရေးတပ်တွေ သတိပေးထားပါတယ်။
