Border News Agency
မြိုင်၊အောက်တိုဘာ ၁၁။
မကွေးတိုင်းဒေသကြီး၊မြိုင်မြို့နယ်နဲ့ပေါက်မြို့နယ်အစပ် ရေနံမြေဘက်ကို အာဏာသိမ်းစစ်တပ်လေကြောင်းတိုက်ခိုက်ခဲ့တာကြောင့် အရပ်သားတဦးသေဆုံးသွားခဲ့ပါတယ်။
အဲဒီနေရာဘက်ကို စစ်ကြောင်းထိုးလာတဲ့ စစ်တပ်ဟာ ညောင်ဦးလေတပ်ကနေ Mi-35 ရဟတ်ယာဉ်တစီး၊ Gyrocopter ခြောက်စီးနဲ့ နှစ်ကြိမ်တိုင်တိုင်အတက်အဆင်းလုပ်ပြီး လေကြောင်းတိုက်ခိုက်ခဲ့တာဖြစ်ပါတယ်။
အဲဒီတိုက်ခိုက်မှုတွေမလုပ်ခင်မှာ ကင်းထောက် ATR-42 လေယာဉ်တစီးနဲ့ အရင်ဝဲပျံစုံစမ်းခဲ့ပြီးမှ အောက်တိုဘာလ ၁၁ ရက်၊ဒီနေ့မနက်ပိုင်း ၉ နာရီအချိန်ကလေကြောင်းတိုက်ခိုက်ခဲ့ကြတာပါ။
အဲဒီလိုလေကြောင်းတိုက်ခိုက်မှုတွေကြောင့် ပြည်သူပိုင်နေအိမ်အချို့ ပျက်စီးခဲ့ရပြီး အမျိုးသားတဦးသေဆုံးခဲ့ရပါတယ်။
အဲဒီအပြင် ပြီးခဲ့တဲ့ စက်တင်ဘာလ ၁၆ ရက်နေ့ကလည်း Gyrocopter သုံးစီးနဲ့ လေကြောင်းတိုက်ခိုက်ခဲ့လို့ ဒေသခံသုံးဦးဒဏ်ရာရခဲ့ပြီး အဲဒီအထဲက အမျိုးသားတဦးဟာ ဝမ်းဗိုက်ဖောက်ထွက်ဒဏ်ရာနဲ့ ထပ်မံသေဆုံးခဲ့ပါတယ်။
