Border News Agency
အိန္ဒိယ၊ အောက်တိုဘာ ၁၆။
မြန်မာနိုင်ငံရဲ့ရေရှည်တည်တံ့တဲ့ ငြိမ်းချမ်းရေးအတွက်အားလုံးပါဝင်တဲ့ နိုင်ငံရေးဆွေးနွေးပွဲတွေနဲ့ ငြိမ်းချမ်းရေး လုပ်တွေကို တိုးမြှင့်ဆောင်ရွက်ကြဖို့ မြန်မာနိုင်ငံဆိုင်ရာ အိန္ဒိယနိုင်ငံသံအမတ်ကြီး H.E. Mr. Abhay Thakur က တိုက်တွန်းပြောပါတယ်။
တနိုင်ငံလုံးပစ်ခတ်တိုက်ခိုက်မှု ရပ်စဲရေးသဘောတူစာချုပ် (NCA) တဆယ့်တနှစ်မြောက်နှစ်ပတ်လည်နေ့မှာ အိန္ဒိယသံအမတ်ကြီးကခုလိုပြောတာပါ။
မြန်မာနိုင်ငံရဲ့အနာဂတ်ကို “မြန်မာပြည်သူတွေကိုယ်တိုင် ဦးဆောင်ပြီး ကိုယ်တိုင်ပိုင်ဆိုင်တဲ့” စစ်မှန်တဲ့အမျိုးသား ပြန်လည်သင့်မြတ်ရေးရရှိရေးအတွက် သက်ဆိုင်သူအားလုံးကြား အပြုသဘောဆောင်တဲ့ ဆွေးနွေးညှိနှိုင်းမှုတွေကို ပံ့ပိုးကူညီသွားမယ်လို့ အိန္ဒိယသံအမတ်ကြီးက ဆိုပါတယ်။
အဲဒီအပြင် နှစ်နိုင်ငံနယ်စပ်ဒေသ တည်ငြိမ်ရေးနဲ့လုံခြုံရေးဟာ မြန်မာနိုင်ငံရဲ့ငြိမ်းချမ်းရေးနဲ့ တိုက်ရိုက်ဆက်စပ်နေတာကြောင့် ဒီမိုကရေစီနဲ့ ဖက်ဒရယ်စနစ်ဆီဦးတည်တဲ့ ရေရှည်ငြိမ်းချမ်းရေးရလဒ်တွေ ဖော်ထုတ်နိုင်ဖို့ ကူညီဆောင်ရွက်ပေးဖို့ အသင့်ရှိကြောင်းလည်း ပြောကြားခဲ့ပါတယ်။
အာဏာသိမ်းစစ်တပ်ဟာ အိန္ဒိယနယ်စပ်အနီးအပါအဝင် နိုင်ငံတဝှမ်းရှိ တိုင်းရင်းသားဒေသတွေမှာ လက်နက်ကြီးနဲ့ လေကြောင်းတိုက်ခိုက်မှုတွေကို ဆက်တိုက်ပြုလုပ်နေတာကြောင့် နှစ်နိုင်ငံ နယ်စပ်ဒေသတည်ငြိမ်ရေးနဲ့ ကုန်သွယ်ရေးလမ်းကြောင်းတွေရပ်တန့်နေရပါတယ်။
အဲဒီအပြင် အိန္ဒိယ-မြန်မာ အဓိကစီးပွားရေးကုန်သွယ်မှုစီမံကိန်းတွေနဲ့ နယ်စပ်ဒေသလုံခြုံရေးဟာ အာဏာသိမ်းစစ်တပ်ရဲ့စစ်ရေးအရ အကြပ်အတည်းတွေ့ပြီး နယ်မြေစွန့်လွှတ်နေရမှုတွေကြောင့် ပိုမိုခြိမ်းခြောက်ခံနေရတယ်လို့ လေ့လာသူတွေက ထောက်ပြကြပါတယ်။
