Border News Agency
နယူးယောက်၊အောက်တိုဘာ ၂၈။
ကုလသမဂ္ဂအထွေထွေညီလာခံ၊တတိယကော်မတီရဲ့မြန်မာနိုင်ငံဆိုင်ရာအစည်းအဝေးမှာ မြန်မာပြည်သူတွေ ခံစားနေရတဲ့ ဒုက္ခဆင်းရဲတွေအပေါ် နိုင်ငံတကာအနေနဲ့ ဆက်လက်နှုတ်ဆိတ်မနေဘဲ ပြည်သူတွေနဲ့အတူ အခိုင်အမာရပ်တည်ပေးဖို့နဲ့ ထပ်မံပျက်ကွက်တာမရှိကြဖို့ဦးကျော်မိုးထွန်းက တောင်းဆိုလိုက်ပါတယ်။
နယူးယောက်မြို့မှာအောက်တိုဘာလ ၂၇ ရက်နေ့က ကျင်းပခဲ့တဲ့အစည်းအဝေးမှာ အာဏာသိမ်းစစ်တပ်ဟာ ပြည်သူတွေအပေါ် လေကြောင်း၊လက်နက်ကြီးတွေနဲ့တိုက်ခိုက်တာ၊ကျေးရွာတွေကိုမီးရှို့ဖျက်ဆီးတာတွေကို ပိုမိုအရှိန်အဟုန်မြှင့်ကျူးလွန်နေပြီး၊ စာသင်ကျောင်း၊ ဆေးရုံနဲ့ စစ်ဘေးရှောင်စခန်းတွေကို အဓိကပစ်မှတ်ထားတိုက်ခိုက်နေတယ်လို့ဆိုပါတယ်။
အဲဒီအပြင် မြေပြင်မှာဖြစ်ပေါ်နေတဲ့ ပကတိအခြေအနေဟာကုလသမဂ္ဂ အစီရင်ခံစာတွေမှာဖော်ပြနိုင်တာထက်ပိုမိုဆိုးရွားနေပြီး၊ အာဏာသိမ်းစစ်တပ်ဆီ တိုက်လေယာဉ်ဆီ၊ လက်နက်နဲ့ ငွေကြေးထောက်ပံ့မှုတွေ ချက်ချင်း ဖြတ်တောက်ဖို့အပြင် နယ်စပ်ဖြတ်ကျော် လမ်းကြောင်းတွေမှတဆင့် အရပ်ဘက်အဖွဲ့အစည်းတွေဆီ လူသားချင်းစာနာမှုအကူအညီတွေတိုက်ရိုက်ပေးပို့ပေးဖို့လည်း တောင်းဆိုခဲ့ပါတယ်။
အာဏာသိမ်းစစ်တပ်နဲ့ပြုလုပ်တဲ့အစည်းအဝေး တခုစီ၊ လက်ဆွဲနှုတ်ဆက်မှုတခုစီတိုင်းဟာ ပြည်သူတွေကိုသတ်ဖြတ်ဖို့ နိုင်ငံရေးအရကာကွယ်ပေးရာရောက်တာကြောင့် နိုင်ငံတကာနဲ့ အိမ်နီးချင်းနိုင်ငံတွေအနေနဲ့ စစ်အုပ်စုကို တရားဝင်မှုပေးအပ်တာမျိုးမလုပ်ကြဖို့လည်း တိုက်တွန်းထားပါတယ်။
မြန်မာပြည်သူတွေဟာ အမျိုးသားညီညွတ်ရေးအစိုးရ (NUG)၊ ဖက်ဒရယ်ဒီမိုကရေစီ ပြည်ထောင်စုပေါ်ထွန်းရေး ဦးဆောင်ကောင်စီ (SCEF) နဲ့ တိုင်းရင်းသား မဟာမိတ်တွေနဲ့အတူ စစ်အာဏာရှင်ချုပ်ငြိမ်းရေးအတွက် ကြံ့ကြံ့ခံတော်လှန်နေကြပြီး၊ နိုင်ငံတကာအနေနဲ့ စစ်ရာဇဝတ်မှုတွေကို အရေးယူနိုင်ဖို့ ICC ထံ လွှဲပြောင်းပေးရန်နဲ့ ပြည်သူတွေအပေါ် ထပ်မံပျက်ကွက်တာမရှိကြဖို့လည်းပြောကြားခဲ့ပါတယ်။
