Border News Agency
ထိုင်း၊ နိုဝင်ဘာ ၁၀။
ထိုင်းနိုင်ငံ၊ ကန်ချနာဘူရီတရားရုံးက မြန်မာရွှေ့ပြောင်းအလုပ်သမားအရေး တက်ကြွလှုပ်ရှားသူ Bright Future အဖွဲ့ခေါင်းဆောင် Weera Saengthong ကို ဖမ်းဝရမ်းထုတ်လိုက်ပါတယ်။
ဒေသဆိုင်ရာ အာဏာပိုင်တွေကသူ့ရဲ့ မွေးစာရင်းကို ပယ်ဖျက်လိုက်ပြီးနောက် အစိုးရအရာရှိတွေကို မှားယွင်းတဲ့ အချက်အလက်တွေပေးခဲ့တယ်ဆိုတဲ့ စွပ်စွဲချက်နဲ့ နိုဝင်ဘာလ ၉ရက်နေ့မှာ ဖမ်းဝရမ်း ထုတ်ပြန်ခဲ့တာဖြစ်ပါတယ်။
သူဟာ အိမ်ထောင်စုစာရင်း သို့မဟုတ် အခြားမှတ်ပုံတင်စာရွက်စာတမ်းတွေမှာ တရားမဝင် ပါဝင်ခွင့်ရရှိဖို့ မှားယွင်းတဲ့ အထောက်အထားတွေ ဖန်တီးအသုံးပြုခဲ့တယ်လို့ စွပ်စွဲခံထားရတာပါ။
အဲဒီပြစ်မှုအတွက် အမြင့်ဆုံး ထောင်ဒဏ် သုံးနှစ်ကျော် ချမှတ်ခံရနိုင်ပြီး ပြစ်မှုဆိုင်ရာတရားစွဲဆိုခွင့် ကာလကို ဆယ်နှစ်သတ်မှတ်ထားပါတယ်။
Weera ဟာ ထိုင်းရောက် မြန်မာရွှေ့ပြောင်းအလုပ်သမားတွေရဲ့ အခွင့်အရေးတွေအတွက် စဉ်ဆက်မပြတ် ကူညီဆောင်ရွက်ပေးနေသူဖြစ်ပြီး မကြာသေးမီက ဘန်ကောက်မြို့ ကုလသမဂ္ဂ အဆောက်အအုံရှေ့ ဆန္ဒပြစဉ် တိုက်ခိုက်ခံခဲ့ရသူဖြစ်ပါတယ်။
