Border News Agency
မြောက်ဦး၊ နိုဝင်ဘာ ၁၄။
အာရက္ခတကျော့ပြန်တိုက်ပွဲ သုံး နှစ်ပြည့်မြောက်တဲ့နေ့မှာ ခက်ခဲကြမ်းတမ်းမှုတွေကြားက ကြံ့ကြံ့ခံရပ်တည်ပေးခဲ့ကြတဲ့ အာရက္ခမိဘပြည်သူတွေအပါအဝင် တိုက်ပွဲဝင်စစ်သည်တော်တွေနဲ့ ပြည်သူ့ဝန်ထမ်းတွေအားလုံးကို အထူးအလေးအနက် ဂုဏ်ပြုကြောင်း ရက္ခိုင်အမျိုးသားအဖွဲ့ချုပ်/အာရက္ခတပ်တော် (ULA/AA)က နိုဝင်ဘာလ ၁၃ရက်နေ့ထုတ်ပြန်ပါတယ်။
၂၀၂၃ ခုနှစ်၊ နိုဝင်ဘာလ ၁၃ရက်နေ့မှစတင်ခဲ့တဲ့ တကျော့ပြန်တိုက်ပွဲ သုံးနှစ်တာကာလအတွင်း အသက်၊ သွေး၊ ချွေး၊ စည်းစိမ်တွေအပြင် သားသမီးရင်သွေးရတနာတွေကိုပါပေးဆပ်ပြီး ရက္ခိတလမ်းစဉ် အထမြောက်စေဖို့ ပါဝင်ရပ်တည်ပေးခဲ့ကြတဲ့ ကမ္ဘာအရပ်ရပ်ရှိ အာရက္ခပြည်သူတရပ်လုံးကို ဦးညွှတ်ဂုဏ်ပြုတယ်လို့လည်းဆိုပါတယ်။
အဲဒီအပြင် သတ္တိရှိရှိ အမိန့်နာခံ တိုက်ပွဲဝင်နေကြတဲ့ အာရက္ခစစ်သည်တော်တိုင်းနဲ့ သူတို့ကို မွေးထုတ်ပေးလိုက်တဲ့ မိခင်တိုင်းအပါအဝင် အာရက္ခပြည်သူ့တော်လှန်ရေးအစိုးရအဖွဲ့ရဲ့ ဌာနဆိုင်ရာ ကဏ္ဍအသီးသီးမှာ တာဝန်ကျေပွန်စွာထမ်းဆောင်နေကြတဲ့ ပြည်သူ့ဝန်ထမ်းတိုင်းကို လေးနက်စွာ ဂုဏ်ပြုထားတာဖြစ်ပါတယ်။
အာရက္ခတပ်တော်ရဲ့ တဆယ့်ခုနှစ် နှစ်တာ သမိုင်းတလျှောက် ပေးဆပ်စွန့်လွှတ် အနစ်နာခံခဲ့ကြတဲ့ စစ်သည်၊ စစ်မယ်တွေရဲ့ ဂုဏ်ကျေးဇူးတွေဟာ အာရက္ခသမိုင်းမှာ အမြဲတမ်းလင်းလက်တောက်ပြောင်နေမှာ ဖြစ်တယ်လို့လည်း ဆိုပါတယ်။
အဲဒီအပြင် အာရက္ခဒေသအတွင်း သိမ်းပိုက်ဖို့ ကျန်ရှိနေသေးတဲ့ စစ်တွေ၊ ကျောက်ဖြူနဲ့ မာန်အောင်မြို့တွေကို ဆက်လက်သိမ်းပိုက်နိုင်ရေး အစွမ်းကုန် ကြိုးပမ်းဆောင်ရွက်နေပြီး အာရက္ခပြည်သူတွေလက်ထဲ မကြာမီ ပေးအပ်သွားမယ်လို့ ULA/AA က အသိပေးထားပါတယ်။
