Border News Agency
ကျောက်တော်၊ နိုဝင်ဘာ ၁၈။
အာရက္ခတပ်တော်(AA)ထိန်းချုပ်ထားတဲ့ သံတွဲ၊ ကျောက်တော်၊ ပလက်ဝ၊ စနဲနဲ့ ပုဏ္ဏားကျွန်းမြို့နယ်ရှိ စစ်ရေးနဲ့မသက်ဆိုင်တဲ့နေရာတွေကို အာဏာသိမ်းစစ်တပ်က လေကြောင်း၊ ဒရုန်းတွေနဲ့ ဆက်တိုက်တိုက်ခိုက်ခဲ့တာကြောင့်အရပ်သားပြည်သူဆယ့်ငါးဦးသေဆုံးခဲ့ရပါတယ်။
အဲဒီသံတွဲမြို့နယ်၊ အမှတ် ၁ ရပ်ကွက်ရှိ GTI ကျောင်းနဲ့အနီးကို နိုဝင်ဘာလ ၁၇ ရက်နေ့မှာ အာဏာသိမ်းစစ်တပ်လေကြောင်းတိုက်ခိုက်လို့ အရပ်သားနှစ်ဦးသေဆုံးပြီး လေးဦးဒဏ်ရာရရှိခဲ့ပါတယ်။
အဲဒီအပြင် ကျောက်တော်မြို့ပေါ်ရှိ စိုက်ပျိုးရေးသိပ္ပံကျောင်းနဲ့အနီးကိုလည်း နိုဝင်ဘာလ ၁၆ ရက်နေ့ကလည်းအာဏာသိမ်းစစ်တပ်လေကြောင်းတိုက်ခိုက်လို့ အရပ်သားသုံးဦး ဒဏ်ရာရသွားခဲ့သလိုကျောင်းဆောင်တွေ ပျက်စီးခဲ့ပါတယ်။
ပုဏ္ဏားကျွန်းမြို့နယ်၊ ကွမ်းတောင်ကျေးရွာအနီးကို နိုဝင်ဘာလ ၁၆ ရက်နေ့က အာဏာသိမ်းစစ်တပ်လေကြောင်းတိုက်ခိုက်ခဲ့သလို နိုဝင်ဘာလ ၁၅ ရက်၊ ညနေပိုင်းကလည်း ကျောက်ဖြူမြို့နယ်၊ စနဲမြို့၊ တောင်ငူစုရပ်ကွက်ကိုလည်းဒရုန်းတွေနဲ့တိုက်ခိုက်ခဲ့လို့ နေအိမ်တွေ မီးလောင်ပျက်စီးခဲ့ရပါတယ်။
အဲဒီအပြင် ပလက်ဝမြို့နယ်၊ သူဌေးကုန်းကျေးရွာအနီးကို နိုဝင်ဘာလ ၁၄ ရက်နေ့က အာဏာသိမ်းစစ်တပ်လေကြောင်းတိုက်ခိုက်လို့ သုံးနှစ်အရွယ်ကလေးငယ်တဦး၊ ငါးလကိုယ်ဝန်ဆောင်အမျိုးသမီးတဦးအပါအဝင် စုစုပေါင်း အရပ်သားတဆယ့်နှစ်ဦးသေဆုံးခဲ့သလို နှစ်ဆယ့်တဦး ဒဏ်ရာရရှိခဲ့ပါတယ်။
အာဏာသိမ်းစစ်တပ်ဟာ အာရက္ခတပ်တော်ထိန်းချုပ်နယ်မြေရှိ စစ်ဘေးရှောင်စခန်းတွေ စာသင်ကျောင်း၊ ဆေးရုံ၊ ဈေးနဲ့ အရပ်သားပြည်သူတွေနေထိုင်ရာရပ်ကွက်၊ ကျေးရွာတွေကို ပစ်မှတ်ထားပြီး ရည်ရွယ်ချက်ရှိရှိလေကြောင်းတိုက်ခိုက်နေပါတယ်။







