Border News Agency
ကျောက်တော်၊ ဇူလိုင် ၂၁
အာရက္ခတပ်တော် (AA) ထိန်းချုပ်ထားတဲ့ ကျောက်တော်မြို့နယ်၊ ဝါးတောင်စစ်ဘေးရှောင်စခန်းမှာ ကလေးအချို့ဟာ ပြင်းထန်သွေးလွန်တုပ်ကွေးရောဂါဖြစ်ပွားနေတယ်လို့ ဒေသခံတွေက BNA ကိုပြောပါတယ်။
လက်ရှိမှာ သွေးလွန်တုပ်ကွေးရောဂါဖြစ်နေတဲ့ ကလေး တစ်ဆယ်ကျော်ရှိတယ်လို့ ဝါးတောင် စစ်ဘေးရှောင်စခန်းတာဝန်ခံ ကိုကျော်နိုင်ထွန်း က BNA ကို ပြောပါတယ်။
“သွေးလွန်တုပ်ကွေးရောဂါဖြစ်ပွားတာ နှစ်ကြိမ်၊ သုံးကြိမ်ရှိပါပြီ။ ခုလည်းဖြစ်နေကြတယ်။ ကလေး တစ်ဆယ်ကျော်လောက်ရှိပါတယ်”
စခန်းထဲမှာ ပြီးခဲ့တဲ့ ဇူလိုင်လ ၁၄ ရက်နေ့ကစလို့ ကလေး တယောက်စ၊ နှစ်ယောက်စ သွေးလွန် တုပ်ကွေး ဖြစ်ရာကနေ တဖြည်းဖြည်းနဲ့ ကလေးအရေအတွက်များလာတာလို့ဆိုပါတယ်။
အဲဒီအထဲက အသက် ၈ နှစ်အရွယ် မောင်လင်းလင်း၊ အသက် ၉ နှစ်အရွယ် မထက်မြတ်လင်းနဲ့ အသက် ၁၄ နှစ်အရွယ် မလှနွယ်ဦး တို့သုံးဦးဟာ ရောဂါပြင်းထန်တဲ့အတွက် ပုဏ္ဏားကျွန်းနဲ့ မြောက်ဦး မြို့နယ်တွေက ဆေးခန်းတွေမှာ အရေးပေါ်ကုသမှုခံယူနေရတယ်လို့လည်း ဒေသခံတွေက ပြောပါ တယ်။
သွေးလွန်တုပ်ကွေးဖြစ်နေတဲ့ ကျန်ကလေးတွေပါ ဆေးဝါးကုသဖို့လိုအပ်နေပေမဲ့ ငွေကြေး အခက်အခဲကြောင့် ဆေးခန်းမပြနိုင်ဘဲဖြစ်နေကြရတယ်လို့ ဝါးတောင်စစ်ဘေးရှောင်စခန်းက ဦးထွန်းနိုင်စိုးက BNA ကို ပြောပါတယ်။
“ဆေးခန်းသွားပြဖို့ ငွေကြေးမတတ်နိုင်ပါဘူး။ တတ်နိုင်ရင် ကျန်းမာရေးကူညီစောင့်ရှောက်မှုတွေ လိုချင်ပါတယ်။ ကျန်းမာရေးအဖွဲ့တဖွဲဖြစ်ဖြစ် စခန်းထဲကိုလာရောက် စောင့်ရှောက်ပေးစေချင်ပါတယ်”
သွေးလွန်တုပ်ကွေးရောဂါဟာ အသက်အနန္တရာယ်ရှိတဲ့ရောဂါဖြစ်လို့ အချိန်မီကုသဖို့လိုအပ်တယ်လို့ ကျန်းမာရေး ဝန်ထမ်းတစ်ယောက်က ပြောပါတယ်။
“သွေးလွန်တုပ်ကွေးရောဂါက အတွင်းမှာသွေးယိုစိမ့်ပြီး သွေးခမ်းတာတွေဖြစ်တတ်တယ်ပေါ့နော်။ ပထမနဲ့ ဒုတိယအဆင့်ဆို ကုသလို့ရပါသေးတယ်။ တတိယနဲ့ စတုတ္တအဆင့်ဆိုရင် ကုသလို့မရ တော့ဘူး။ အဲ့ဒီရောဂါတွေဖြစ်နေတာကို ဖြစ်မှန်းမသိဘဲ ဒီအတိုင်း ဆေးမသောက်ဘဲ နေလိုက်ရင် အသက်သေစေတဲ့အထိကို အန္တရာယ်ရှိတယ်”
သွေးလွန်တုပ်ကွေးရောဂါဟာ ရောဂါပိုးကိုသယ်ဆောင်နိုင်တဲ့ ခြင်တွေကနေတစ်ဆင့် ကူးစက်တတ် တာကြောင့် လိုအပ်တဲ့အကာအကွယ်တွေအပြင် ခြင်ထောင်နဲ့အိပ်ဖို့လိုအပ်တယ်လို့လည်း သူက အကြံပြုပါတယ်။
ဝါးတောင်စစ်ဘေးရှောင်စခန်းမှာ စစ်တွေ၊ သံတွဲနဲ့ ပုဏ္ဏားကျွန်းမြို့နယ်တွေက စစ်ဘေးရှောင် အိမ်ထောင်စု ၃၃ စု၊ လူဦးရေစုစုပေါင်း ၁၃၈ ဦး ခိုလှုံနေပါတယ်။
အာရက္ခဒေသမှာ တိုက်ပွဲတွေစတင်ခဲ့တဲ့ ၂၀၂၃ နှစ်ကုန်ပိုင်းကနေစလို့ စစ်ကောင်စီက ကုန်လမ်း၊ ရေလမ်းတွေကို ပိတ်ဆို့ဖြတ်တောက်ထားတာကြောင့် ဆေးဝါးရှားပါးတဲ့ အခက်အခဲတွေနဲ့ပါ ကြုံတွေ့နေကြရပါတယ်။
