Border News Agency
ဝိုင်းမော်၊ ဩဂုတ် ၃၀။
ကချင်ပြည်၊ မြစ်ကြီးနားခရိုင်၊ ဝိုင်းမော်မြို့နယ်မှာ ငွေကျပ် ၃,၀၃၇ သိန်းတန်ဖိုးရှိ မူးယစ်ဆေးဝါးတွေဖမ်းဆီးရမိခဲ့တယ်လို့ မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့က သြဂုတ်လ ၂၉ ရက်၊ မနေ့ကထုတ်ပြန်ပါတယ်။
အဲဒီဝိုင်းမော်မြို့နယ်၊ မိုင်းနားကျေးရွာအနီးမှာ ဩဂုတ်လ ၂၇ ရက်၊ ည ၇နာရီ ၃၀မိနစ်အချိန်က ဂွန်းဆန့်မောင်းနှင်လာတဲ့TOYOTA HILUX VIGO အမျိုးအစား မော်တော်ယာဉ်ကို ရပ်တန့်စစ်ဆေးခဲ့တာပါ။
အဲဒီယာဉ်ပေါ်မှာ သိုဝှက်သယ်ဆောင်လာတဲ့ ငွေကျပ်သိန်း ၁,၂၈၇ တန်ဖိုးရှိ ဘိန်းဖြူ အလေးချိန် ၅.၈၅ ကီလို ၊ ငွေကျပ်သိန်း ၁,၇၅၀ တန်ဖိုးရှိ စိတ်ပြောင်းဆေးဝါး Happy Water အလေးချိန် ၂.၅ ကီလိုနဲ့ လက်ကိုင်ဖုန်း ၁လုံးတို့ကို သိမ်းဆည်းရမိခဲ့ပါတယ်။
မူးယစ်ဆေးဝါးတွေနဲ့အတူဖမ်းဆီးရမိခဲ့သူ အသက်၃၅နှစ်အရွယ် ဂွန်းဆန့်ကို ဝိုင်းမော်မြို့မရဲစခန်းမှာ မူးယစ်ဆေးဝါးနဲ့ စိတ်ကိုပြောင်းလဲစေတဲ့ဆေးဝါးများဆိုင်ရာဥပဒေအရ အမှုဖွင့်အရေးယူထားပါတယ်။
