Border News Agency
စပိန်၊ ဇန်နဝါရီ ၂၀။
စပိန်နိုင်ငံတောင်ပိုင်း၊ အာဒါမူးစ် (Adamuz) မြို့အနီးမှာဖြစ်ပွားခဲ့တဲ့ အမြန်ရထားနှစ်စင်းတိုက်မိလို့ သေဆုံးသူလေးဆယ်ဦးအထိ မြင့်တက်လာတယ်လို့ စပိန်ပြည်ထဲရေးဝန်ကြီးဌာနက ဇန်နဝါရီလ ၂၀ ရက်၊ ဒီနေ့ ထုတ်ပြန်ပါတယ်။
အဲဒီဖြစ်စဉ်ဟာ စပိန်နိုင်ငံရဲ့နှစ်ပေါင်းရှစ်ဆယ်အတွင်းမှာ ဥရောပတိုက်ရဲ့အဆိုးရွားဆုံး ရထားမတော်တဆမှုတွေထဲက တခုဖြစ်တယ်လို့ ဆိပါတယ်။
အဲဒီ မက်ဒရစ် – ဆီဗီးလ် အမြန်ရထားလမ်းမှာ ဇန်နဝါရီလ ၁၈ ရက်၊ ည ၉ နာရီအချိန်ကဖြစ်ပွားခဲ့တဲ့ ဒီမတော်တဆမှုကြောင့် ခုနောက်ဆုံးစာရင်းအရ သေဆုံးသူလေးဆယ်ဦးအထိရှိလာနေတယ်လို့ ဆိုပါတယ်။
အဲဒီအပြင် ဒဏ်ရာရရှိသူနှစ်ရာ့ကိုးဆယ့်နှစ်ဦးရှိပြီး အဲဒီထဲကဆယ့်ငါးဦးကတော့ စိုးရိမ်ရတဲ့အတွက် အထူးကြပ်မတ်ကုသဆောင် (ICU) မှာ ကုသမှုခံယူနေရတယ်လို့ ဆိုပါတယ်။
အဲဒါကြောင့် ရထားလမ်းအာဏာပိုင်တွေရဲ့ စစ်ဆေးချက်အရ ဥရောပရထားထိန်းချုပ်စနစ် (ETCS) မှာ နည်းပညာပိုင်းဆိုင်ရာချို့ယွင်းမှုဖြစ်ပြီး ရထားနှစ်စင်းစလုံးကို လမ်းကြောင်းတခုတည်းမှာမောင်းနှင်ဖို့ အချက်ပြမှားယွင်းခဲ့တာကြောင့် ခုလိုတိုက်မိရတာလို့ ယူဆထားကြပါတယ်လို့ ဆိုပါတယ်။
အဲဒီမတော်တဆဖြစ်ချိန်မှာ ရထားနှစ်စင်းဟာ တနာရီကိုကီလိုမီတာ ၂၀၀ ကျော် အရှိန်နဲ့ မောင်းနှင်လာတာဖြစ်ပြီး တိုက်မိတဲ့အရှိန်ကြောင့် ရထားတွဲတွေလမ်းချော်ကာ တခုနဲ့တခုထပ်မိပြီး ပျက်စီးသွားခဲ့တာပါ။
အဲဒီရထားနှစ်စင်းလုံးရဲ့ Black Box တွေကိုရှာဖွေတွေ့ရှိထားပြီး မတော်တဆမဖြစ်ခင် နောက်ဆုံးစက္ကန့်ပိုင်းအခြေအနေတွေကို တာဝန်ရှိသူတွေက ခွဲခြမ်းစိတ်ဖြာစစ်ဆေးနေပါတယ်လို့ ဆိုပါတယ်။
အဲဒီအပြင် ရထားလမ်းပေါ်က ပျက်စီးနေတဲ့ အစိတ်အပိုင်းတွေကိုလည်း စုံစမ်းစစ်ဆေးသူတွေက ရှာဖွေတွေ့ရှိခဲ့တယ်လို့ ဆိုပါတယ်။
အဲဒါနဲ့ပတ်သက်လို့ စပိန်အစိုးရကတော့ ဇန်နဝါရီလ ၁၉ ရက်နေ့ကစပြီး ၃ ရက်ကြာ နိုင်ငံတော်ဝမ်းနည်းခြင်း အထိမ်းအမှတ်အဖြစ်သတ်မှတ်ထားကာ အစိုးရအဆောက်အအုံတွေမှာ အလံတဝက် လွှင့်ထူထားပါတယ်။
အဲဒီဒဏ်ရာရရှိသူတွေအတွက် သွေးအရေးပေါ်လိုအပ်နေတာကြောင့် ကော်ဒိုဘာနဲ့ မက်ဒရစ်မြို့ကဆေးရုံတွေမှာ ပြည်သူထောင်ပေါင်းများစွာက သွေးလှူဒါန်းဖို့တန်းစီစောင့်ဆိုင်းနေကြတယ်လို့ သိရှိရပါတယ်။
