Border News Agency
ထိုင်း၊ ဖေဖော်ဝါရီ ၁၈။
ထိုင်း – မြန်မာနယ်စပ်၊ တာ့ခ်ခရိုင်၊ မဲဆောက်မြို့နယ်ရှိ ဆောက်လုပ်ရေးလုပ်ငန်းခွင်တခုမှာ တရားမဝင်အလုပ်လုပ်ကိုင်နေတဲ့ မြန်မာနိုင်ငံသား ၆ ဦးကို ဖေဖော်ဝါရီ ၁၇ ရက်နေ့က ဖမ်းဆီးရမိခဲ့တယ်လို့ တာ့ခ်ခရိုင်လဝက ကထုတ်ပြန်ပါတယ်။
အဲဒီတာ့ခ်ခရိုင် လဝကရဲတပ်ဖွဲ့၊ စုံစမ်းစစ်ဆေးရေးအဖွဲ့နဲ့ အလုပ်သမားညွှန်ကြားမှုဦးစီးဌာနတို့ပူးပေါင်းပြီး မနက် ၁၀ နာရီကျော်မှာ ရှောင်တခင်ဝင်ရောက်စစ်ဆေးမှုတွေ ပြုလုပ်ခဲ့တာပါ။
အဲဒီစစ်ဆေးမှုကို မဲဆောက်မြို့နယ်၊ သာဆိုင်းလော့ဒ် (Tha Sai Luat) ကျေးရွာအုပ်စုအတွင်းရှိ လိပ်စာအတိအကျမရှိတဲ့ ဆောက်လုပ်ရေးလုပ်ငန်းခွင်တခုမှာ ပြုလုပ်ခဲ့တာဖြစ်ပြီး မြန်မာလုပ်သား ၆ ဦးကို ဖမ်းဆီးနိုင်ခဲ့ပါတယ်။
အဲဒီ ဖမ်းဆီးခံရသူတွေဟာ ထိုင်းနိုင်ငံအတွင်းကိုခွင့်ပြုချက်မရှိဘဲ ခိုးဝင်လာသူတွေဖြစ်သလို အလုပ်လုပ်ကိုင်ခွင့်လက်မှတ် (Work Permit) မရှိဘဲ အလုပ်လုပ်နေသူတွေ ဖြစ်ပါတယ်။
လက်ရှိမှာတော့ သူတို့ ၆ ဦးကို ခိုးဝင်မှု၊ အလုပ်လုပ်ကိုင်ခွင့်မရှိဘဲ လုပ်ကိုင်မှုတွေနဲ့ ထိုင်းဥပဒေအရ အရေးယူနိုင်ဖို့ ဆောင်ရွက်ထားတယ်လို့ သိရပါတယ်။
အခုနောက်ပိုင်း ထိုင်းနယ်စပ်တလျှောက်မှာ တရားမဝင်ဝင်ရောက်မှုနဲ့ အလုပ်လုပ်ကိုင်မှုတွေကို ထိုင်းအာဏာပိုင်တွေက အထူးကြပ်မတ် စစ်ဆေးနေတာကြောင့် ရွှေ့ပြောင်းလုပ်သားတွေအနေနဲ့ အထူးသတိထားနေကြရတယ်လို့ သိရပါတယ်။
