Border News Agency
လယ်ဒို၊ မတ် ၇။
ပဲခူးတိုင်း၊ လယ်ဒိုမြို့နယ်နဲ့ မူးမြို့နယ်မှာ စစ်ကော်မရှင်တပ်က လက်နက်ကြီး၊ ဒရုန်းတွေနဲ့ပစ်ခတ်တိုက်ခိုက်လို့ အရပ်သား ၅ ဦး ဒဏ်ရာရသွားတယ်လို့ KNU က မတ်လ ၆ ရက်၊ မနေ့ကထုတ်ပြန်ပါတယ်။
လယ်ဒိုမြို့နယ်၊ အင်းပရိကျေးရွာကိုမတ်လ ၅ ရက်နေ့က စစ်ကော်မရှင်တပ်ရဲ့ ခလရ ၂၆၄ က ၁၂၀ မမ လက်နက်ကြီးနဲ့ ပစ်ခတ်ခဲ့တာကြောင့် အသက် ၃၃ နှစ်အရွယ် ကိုထိုက်ထိုက်အောင်နဲ့ အသက် ၄၆ နှစ်အရွယ် မခက်ခက်နိုင်တို့ ဒဏ်ရာရခဲ့ပါတယ်။
မူးမြို့နယ်၊ နတ်လောင်းလေးကျေးရွာမှာလည်း မတ်လ ၄ ရက်နေ့က ဒရုန်းနဲ့ဗုံးကြဲတိုက်ခိုက်ခံရလို့ အသက် ၅၃ နှစ်အရွယ် ဦးစိုးသိန်းနဲ့ အသက် ၄၅ နှစ်အရွယ် မဖြူတို့ ဒဏ်ရာရခဲ့သလို အသက် ၃၃ နှစ်အရွယ် ဦးငြိမ်းချမ်းဦးမှာလည်း စစ်ကော်မရှင်တပ်က ထောင်ထားတဲ့ မြေမြှုပ်မိုင်းကို နင်းမိပြီး ဒဏ်ရာရခဲ့တာပါ။
အဲဒီလယ်ဒိုမြို့နယ်အတွင်းမှာ မတ်လ ၂ ရက်နေ့ကလည်း စစ်ကော်မရှင်တပ်ရဲ့ပစ်ခတ်မှုကြောင့် အရပ်သား ၂ ဦး ဒဏ်ရာရရှိခဲ့ပါသေးတယ်။
စစ်ကော်မရှင်တပ်ဟာ စစ်မြေပြင်တင်မကဘဲ ကျေးရွာတွေထဲကိုပါ လက်နက်ကြီးနဲ့ဒရုန်းတွေသုံးပြီး ပစ်မှတ်ထားတိုက်ခိုက်လာတာကြောင့် အရပ်သားထိခိုက်မှုတွေပိုတိုးလာနေပါတယ်။
