Border News Agency
ထိုင်း၊ မေ ၁၆။
ထိုင်းနိုင်ငံမြောက်ပိုင်း၊ ချန်ရိုင်းခရိုင်၊ ထိန်မြို့နယ်အတွင်းမှာ ထိုင်းစစ်တပ်ရဲ့ ဖာမိူင်းတပ်ဖွဲ့နဲ့မူးယစ်ဆေးဝါးနှိမ်နင်းရေးအဖွဲ့တွေပူးပေါင်းပြီး စိတ်ကြွရူးသွပ်ဆေးပြား၄ သန်းကို ဖမ်းဆီးရမိခဲ့ပါတယ်။
အဲဒီထိန်မြို့နယ်၊ ငေါင်ကျေးရွာအနီးမှာ မေလ ၁၄ ရက်နေ့က ယာယီစစ်ဆေးရေးဂိတ်ဖွင့်ပြီး စစ်ဆေးနေစဉ် သံသယဖြစ်ဖွယ်ဖော့ဒ်အမျိုးအစားကားတစီး မောင်းနှင်လာခဲ့တာဖြစ်ပါတယ်။
အဲဒီကားဟာ စစ်ဆေးရေးဂိတ်ကိုတွေ့ချိန်မှာ လမ်းကြောင်းပြန်လှည့်ပြီး ထွက်ပြေးဖို့ကြိုးစားခဲ့ပေမယ့် ဂိတ်နဲ့မီတာ ၂၀၀ ခန့်အကွာလမ်းဘေးသို့ ထိုးကျတိမ်းမှောက်ခဲ့ပြီး ကားမောင်းသမားကတော့ အမှောင်ထုကိုအသုံးချကာ ထွက်ပြေးလွတ်မြောက်သွားခဲ့တယ်လို့ဆိုပါတယ်။
အဲဒီတိမ်းမှောက်သွားတဲ့ကားအတွင်းကို အာဏာပိုင်တွေကဝင်ရောက်စစ်ဆေးခဲ့ရာ သက်တံရောင်ဆာလာအိတ် ၁၆ အိတ်အတွင်း စနစ်တကျထည့်သွင်းသယ်ဆောင်လာတဲ့ စိတ်ကြွဆေးပြား စုစုပေါင်း ၄ သန်းခန့်ကို ရှာဖွေပုံစံရရှိခဲ့တာပါ။
အဲဒီဖမ်းဆီးရမိတဲ့မူးယစ်ဆေးဝါးတွေကို မေလ ၁၅ ရက်နေ့မှာ တာဝန်ရှိသူတွေက မီဒီယာတွေကိုချပြရှင်းလင်းခဲ့ပြီး လက်ရှိမှာတော့ ထွက်ပြေးသွားတဲ့တရားခံကို ဖမ်းဆီးရမိဖို့နဲ့ ဥပဒေအရထိရောက်စွာအရေးယူနိုင်ဖို့ သက်ဆိုင်ရာရဲစခန်းဆီလွှဲပြောင်းပေးထားတယ်လို့ သိရပါတယ်။
