Border News Agency
မလေးရှား၊ဇူလိုင် ၇။
မလေးရှားနိုင်ငံ၊ကဒါးပြည်နယ်၊ဆွန်ဂိုင်းပတ္တနီမြို့ရှိ ဈေးဝယ်စင်တာတခုမှာ တရားဝင်စာရွက်စာတမ်းမရှိတဲ့ ရွှေ့ပြောင်းလုပ်သားကိုးဦးကိုဖမ်းဆီးခဲ့တယ်လို့ လူဝင်မှုကြီးကြပ်ရေးဌာန (JIM)က ဇူလိုင်လ ၆ ရက်နေ့မှာ ထုတ်ပြန်ပါတယ်။
အဲဒီဈေးဝယ်စင်တာရှိ လူဆယ့်သုံးဦးကို ဇူလိုင်လ ၆ ရက်နေ့ကစစ်ဆေးခဲ့တာဖြစ်ပြီး တရားဝင်နေထိုင်ခွင့် ပါမစ်မရှိတဲ့အတွက် ဖမ်းဆီးခဲ့တာပါ။
အဲဒီ ဖမ်းဆီးခံရသူတွေထဲမှာ မြန်မာအမျိုးသမီးတဦးအပြင် ဘင်္ဂလားဒေ့ရှ် အမျိုးသား လေးဦးနဲ့ အင်ဒိုနီးရှားနိုင်ငံသားလေးဦးတို့ ပါဝင်ပါတယ်။
အဲဒီ အသက်နှစ်ဆယ့်သုံးနှစ်ကနေ လေးဆယ်ခြောက်နှစ်ကြားရှိတဲ့ သူတို့အားလုံးကို လူဝင်မှုကြီးကြပ်ရေးအက်ဥပဒေအရ အရေးယူနိုင်ဖို့အတွက် ဘီလန်တစ် လူဝင်မှုကြီးကြပ်ရေးစခန်းကို ပို့ဆောင်လိုက်ပြီလို့ သိရပါတယ်။
မလေးရှားနိုင်ငံမှာ အခုလိုမျိုး ဈေးဝယ်စင်တာတွေနဲ့ လုပ်ငန်းခွင်တွေကို ဝင်ရောက်စစ်ဆေးပြီး တရားမဝင်လုပ်သားတွေကို ဖမ်းဆီးတာတွေ မကြာခဏဆိုသလို လုပ်ဆောင်နေတာ ဖြစ်ပါတယ်။
