Border News Agency
နယူးဒေလိီ၊ဇူလိုင် ၂၁။
အိန္ဒိယနိုင်ငံ၊နယူးဒေလီမြို့မှာ လူငယ်တွေ ဦးဆောင်ပြုလုပ်နေတဲ့ Cockroach Janta Party လှုပ်ရှားမှုကို အိန္ဒိယအစိုးရက အကြမ်းဖက် ဖြိုခွင်းမှုတွေ ပြုလုပ်ခဲ့တယ်လို့ အယ်ဂျာဇီးယား သတင်းမှာ ဖော်ပြထားပါတယ်။
စာမေးပွဲမေးခွန်း ပေါက်ကြားမှုတွေကြောင့် ပညာရေးဝန်ကြီး ဓမ္မံဒရာ ပရာသန် ကို နုတ်ထွက်ပေးဖို့ တောင်းဆိုရာမှ စတင်ခဲ့တဲ့ အဲဒီလူထုလှုပ်ရှားမှုမှာ ပါဝင်သူတွေကို အစိုးရတပ်ဖွဲ့တွေက မျက်ရည်ယိုဗုံးတွေနဲ့ ပစ်ခတ်တာ၊နံပါတ်တုတ်တွေနဲ့ ရိုက်နှက်တာနဲ့ အဓမ္မ ဖမ်းဆီးတာတွေ လုပ်ဆောင်ခဲ့တာ ဖြစ်ပါတယ်။
ပြီးခဲ့တဲ့ မေလအတွင်း အိန္ဒိယ တရားလွှတ်တော် တရားသူကြီးချုပ်က အလုပ်လက်မဲ့ဖြစ်နေတဲ့ လူငယ်တွေကို ပိုးဟပ်တွေလို့ နှိုင်းယှဉ်ပြောဆိုခဲ့ရာမှ အဲဒီ CJP လှုပ်ရှားမှု စတင်ပေါ်ပေါက်လာခဲ့တာဖြစ်ပြီး လက်ရှိမှာတော့ အထွေထွေသပိတ်အဆင့်ထိ ကူးပြောင်းလာခဲ့တာပါ။
အဲဒီလှုပ်ရှားမှုမှာ ပညာရေးနဲ့ သဘာဝပတ်ဝန်းကျင်အရေး တက်ကြွလှုပ်ရှားသူ ဆိုနမ် ဝမ်ချပ် ပါဝင်လာပြီး အစာငတ်ခံ ဆန္ဒပြခဲ့ပေမယ့် ပြီးခဲ့တဲ့ရက်ပိုင်းက ရဲတပ်ဖွဲ့ကသူ့ကို လာရောက်ဖမ်းဆီးကာ ဆေးရုံသို့ အဓမ္မ ပို့ဆောင်ခဲ့တယ်လို့ ဇနီးဖြစ်သူက ဆိုပါတယ်။
အိန္ဒိယလွှတ်တော်ကို ချီတက်ဖို့ ကြိုးပမ်းနေတဲ့ ဆန္ဒပြသူတွေကို အစိုးရ လုံခြုံရေးတပ်ဖွဲ့တွေက အကြမ်းဖက်ဖြိုခွင်းနေတဲ့ သတင်းတွေထွက်ပေါ်နေသလို အခြားတဖက်မှာလည်း အစိုးရအနေနဲ့ လှုပ်ရှားမှု ဦးဆောင်သူတွေနဲ့ ဆွေးနွေးဖို့ ရှိတယ်လို့ ထုတ်ဖော်ပြောဆိုထားပါတယ်။
