Border News Agency
ထိုင်း၊ဇူလိုင် ၂၁။
ထိုင်းနိုင်ငံ၊ဘန်ကောက်မြို့ Lat Phrao ရှိ ဘားမီးလောင်မှုမှာ သေဆုံးခဲ့ရသူတွေအတွက် ထိုင်းအစိုးရက လူသားချင်း စာနာထောက်ထားမှု အခြေခံနဲ့ဇူလိုင်လ ၂၀ ရက်နေ့မှာ နစ်နာကြေးတွေထုတ်ပေးခဲ့ပါတယ်။
အဲဒီမီးလောင်မှုကြောင့် သေဆုံးခဲ့သူ စုစုပေါင်းသုံးဆယ်တဦးရှိခဲ့ပြီးတဦးကိုဘတ်သုံးသိန်းစီနဲ့ စုစုပေါင်း ဘတ်ကိုးဒသမသုံးသန်းကို နစ်နာကြေးအဖြစ် ထောက်ပံ့ပေးခဲ့တာ ဖြစ်ပါတယ်။
မနေ့ကကျင်းပတဲ့ အခမ်းအနားကိုတက်ရောက်လာသူ မိသားစုဝင်ဆယ့်လေးဦးကို နစ်နာကြေး ကိုယ်တိုင်ပေးအပ်ခဲ့ပြီး မတက်ရောက်နိုင်သေးသူတွေရဲ့ နစ်နာကြေးကိုတော့ ဘဏ်အကောင့်ထဲ တိုက်ရိုက် လွှဲပြောင်းပေးသွားမယ်လို့ သိရပါတယ်။
ပြည်သူ့အခွန်ငွေတွေကို ရာဇဝတ်မှု နစ်နာကြေးအဖြစ် သုံးစွဲနေမှုအပေါ် ဝေဖန်မှုတွေ ရှိနေပေမယ့် နာရေးစရိတ်မတတ်နိုင်တဲ့ မိသားစုတွေအတွက် လူ့အခွင့်အရေးအရ ကူညီပေးတာဖြစ်တယ်လို့ တာဝန်ရှိသူတွေကပြောဆိုပါတယ်။
အစိုးရအနေနဲ့ ပြည်သူ့ဘဏ္ဍာတခုတည်းကိုပဲ မှီခိုနေရတဲ့ အကူအညီပေးရေးစနစ်ထက် ပိုမို ထိရောက်မှုရှိစေဖို့အတွက် တရားမျှတမှုစနစ် အတွင်းမှာ ရန်ပုံငွေအဖွဲ့တခု တည်ထောင်ဖို့ပါ စဉ်းစားနေပါတယ်။
