Border News Agency
ဂွ၊အောက်တိုဘာ ၂၉။
အာရက္ခတပ်တော်(AA)ထိန်းချုပ်ထားတဲ့ ဂွမြို့နယ်ရှိ ကမ်းသာယာကမ်းခြေမှာ အောက်တိုဘာလ ၂၈ ရက်နေ့က လူငယ်တစုပင်လယ်ရေဆင်းကူးရာမှ စစ်ဘေးရှောင်ကလေးငယ်တဦးနဲ့ ဒေသခံဇနီးမောင်နှံအပါအဝင် လူငယ်လေးဦး ရေနစ်သေဆုံးသွားခဲ့ပါတယ်။
အဲဒီကမ်းသာယာကျေးရွာမှ အသက်တဆယ့်ခုနှစ်နှစ်အရွယ် မမေပိုးအိမ်၊အသက်နှစ်ဆယ် အရွယ်မသက်နှင်းဝေ၊အသက်နှစ်ဆယ့်လေးနှစ်အရွယ် မောင်ထွန်းလင်းနိုင်နဲ့ ဧရာဝတီတိုင်း၊ လေးမျက်နှာမြို့နယ်ကနေ လာရောက်စစ်ဘေးရှောင်နေတဲ့ အသက်တဆယ့်လေးနှစ်အရွယ် မောင်ဇွဲနေသွေးတို့သေဆုံးသွားတာပါ။
သေဆုံးသူတွေထဲက မသက်နှင်းဝေနဲ့ မောင်ထွန်းလင်းနိုင်တို့ဟာ ဂွဒေသခံဇနီးမောင်နှံဖြစ်ကြပြီး ရေနစ်သေဆုံးသွားတဲ့ လူငယ်လေး ဦးရဲ့ ရုပ်အလောင်းတွေကို အောက်တိုဘာလ ၂၉ ရက်၊ဒီနေ့မနက်က သင်္ဂြိုဟ်ပေးခဲ့ပါတယ်။
အဲဒီကမ်းသာယာကမ်းခြေပင်လယ်ပြင်ဟာ ဒီရေတက်ချိန်နဲ့ ရေစီးကြောင်းပြောင်းလဲချိန်တွေမှာ အန္တရာယ်များတာကြောင့် ရေကူးသူတွေအနေနဲ့ သတိထားကြဖို့ ဒေသခံတွေကအသိပေးထားပါတယ်။
အာရက္ခဒေသမှာလည်း ပင်လယ်ကမ်းခြေနဲ့ မြစ်ချောင်းတွေမှာ ရေဆင်းကူးရာမှ ရေနစ်သေဆုံးမှု ဖြစ်စဉ်တွေ တဖြည်းဖြည်းပိုမိုတိုးလာနေတာကြောင့် ဒေသခံတွေနဲ့ ခရီးသွားတွေအနေနဲ့ အထူး သတိပြုကြဖို့ လိုအပ်နေတာဖြစ်ပါတယ်။
