Border News Agency
နေပြည်တော်၊ အောက်တိုဘာ ၂၉။
တရားမဝင်ကုန်သွယ်မှုတွေမဖြစ်ပေါ်စေရေး သက်ဆိုင်ရာနယ်မြေဒေသတွေအလိုက် စနစ်တကျဖော်ထုတ်တားဆီး ထိန်းသိမ်းဆောင်ရွက်ဖို့လိုပြီး အမျိုးသားအကျိုးစီးပွားကို ခိုင်ခိုင်မာမာကာကွယ်ဆောင်ရွက်ဖို့ အာဏာသိမ်းစစ်ခေါင်းဆောင်မင်းအောင်လှိုင်ကပြောပါတယ်။
နေပြည်တော်မှာကျင်းပခဲ့တဲ့ ပြည်ထောင်စုအစိုးရအဖွဲ့အစည်းအဝေးမှာမင်းအောင်လှိုင်က ခုလိုပြောခဲ့တာပါ။
အဲဒီစိုက်ပျိုးမွေးမြူရေးကို အခြေခံတဲ့ကုန်ထုတ်လုပ်မှုတွေတိုးတက်မှသာ ကုန်ဈေးနှုန်းကြီးမြင့်မှုတွေကို လျှော့ချနိုင်မယ်လို့လည်း ဆိုပါတယ်။
အဲဒီအပြင်နယ်စပ်ဒေသတွေမှာ တရားမဝင်ကုန်သွယ်မှုတွေကြောင့် နိုင်ငံအတွက်ရသင့်ရထိုက်တဲ့ အခွန်အခတွေ ဆုံးရှုံးရုံမျှမက လက်နက်ကိုင်အဖွဲ့အစည်းတွေအတွက် ငွေကြေးအင်အားတိုးချဲ့ရာရောက်စေတဲ့အတွက် တရားဝင် လမ်းကြောင်းတွေက အဓိကဆောင်ရွက်ကြဖို့ပြောခဲ့ပါတယ်။
အာဏာသိမ်းစစ်တပ်ရဲ့ မဟာဗျူဟာမြောက် နယ်စပ်ကုန်သွယ်ရေးစခန်းအများစုဟာ တော်လှန်ရေးတပ်ဖွဲ့တွေရဲ့ ထိန်းချုပ်မှုအောက်သို့ရောက်ရှိနေပြီး အာဏာသိမ်းစစ်တပ်အနေနဲ့ နယ်စပ်ကုန်သွယ်မှုယန္တရားတွေကို ပုံမှန် လည်ပတ်နိုင်တာမရှိတော့ပါဘူး။
တဖက်မှာလည်း မြို့ပြနဲ့ဒေသအများအပြားမှာ စက်သုံးဆီ၊ စားသုံးဆီနဲ့ အခြေခံ ကုန်ပစ္စည်းဈေးနှုန်းတွေ စံချိန်တင် မြင့်တက်နေပြီး ငွေကြေးတန်ဖိုးမတည်ငြိမ်မှုနဲ့ စီးပွားရေးကျဆင်းမှုဒဏ်ကို ပြည်သူတွေအလူးအလဲ ခံစားနေကြရပါတယ်။
