Border News Agency
ပုလော၊ နိုဝင်ဘာ ၇။
တနင်္သာရီတိုင်း၊ပုလောမြို့နယ်၊မဇော်ကျေးရွာကို အာဏာသိမ်းစစ်တပ်လေကြောင်းတိုက်ခိုက်လို့မသန်စွမ်း တဦးအပါအဝင်အရပ်သား သုံးဦးသေဆုံးပြီး ခုနှစ်ဦးဒဏ်ရာ ရသွားခဲ့တယ်လို့ ကရင်အမျိုးသားအစည်းအရုံး (KNU) ရဲ့ မြိတ်-ထားဝယ်ခရိုင် ပြည်သူ့ဆက်ဆံရေးနဲ့သတင်းပြန်ကြားရေးက ထုတ်ပြန်ထားပါတယ်။
အဲဒီ ပုလောမြို့နယ်၊မဇော်ကျေးရွာကို နိုဝင်ဘာလ၆ ရက်၊မနက် ၉ နာရီ ၅၀ မိနစ်အချိန်က အာဏာသိမ်းစစ်တပ်တိုက်လေယာဥ်တစီး၊ဂျိုင်ရိုကော်ပတာ သုံးစီးနဲ့ လေကြောင်းတိုက်ခိုက်ခဲ့တာဖြစ်ပါတယ်။
အဲဒီလေကြောင်းတိုက်ခိုက်မှုကြောင့် မဇော်ကျေးရွာမှ မသန်စွမ်း တဦးအပါအဝင် အရပ်သား သုံးဦး သေဆုံးခဲ့ရပြီး အသက်ဆယ်နှစ်အရွယ် ကလေးငယ် တဦးအပါအဝင်ခုနှစ်ဦးဒဏ်ရာ ရသွားခဲ့ပါတယ်။
အဲဒီအပြင်နေအိမ် တလုံး၊ မူကြိုစာသင်ကျောင်းတကျောင်းနဲ့ ဆိုင်ကယ် တစီးလည်း ပျက်စီးသွားခဲ့ပါတယ်။
အဲဒီ ပုလောမြို့နယ်၊ ကဒဲကျေးရွာရှိ ဘုန်းကြီးကျောင်းကို ပြီးခဲ့တဲ့ အောက်တိုဘာလ ၂၂ ရက်နေ့ကလည်းအာဏာသိမ်းစစ်တပ်က လေကြောင်းတိုက်ခိုက်လို့ ဘုန်းကြီးကျောင်းနဲ့သာသနာ့အဆောက်အအုံအချို့ပျက်စီးခဲ့ပါသေးတယ်။
