Border News Agency
ထိုင်း၊ နိုဝင်ဘာ ၁၇။
ထိုင်းနိုင်ငံ၊ဘန်ကောက်မြို့အနီး ပထုံဌာနီခရိုင်မှာ ထိုင်းကျောင်းသားတဦးဆီကနေ အိုင်ဖုန်း နဲ့ ငွေကြေးတွေလုယက်သွားခဲ့တဲ့ မြန်မာနိုင်ငံသားသုံးဦးကို ထိုင်းရဲတပ်ဖွဲ့က နိုဝင်ဘာလ ၁၆ ရက် ညပိုင်းမှာဖမ်းဆီးလိုက်ပါတယ်။
ဘန်ကောက်တက္ကသိုလ်ကျောင်းသားဟာ စတိုးဆိုင်ကို လမ်းလျှောက်သွားနေစဉ် ဆိုင်ကယ်နဲ့ရောက်လာသူတွေက ဓား၊ သေနတ်တို့နဲ့ ခြိမ်းခြောက်ပြီး အိုင်ဖုန်းဆယ့်ခြောက် ပရိုမက်စ်နဲ့ ငွေစက္ကူအချို့ကို လုယက်ယူဆောင်သွားခဲ့တာဖြစ်ပါတယ်။
ရဲတပ်ဖွဲ့က လိုက်လံစုံစမ်းစစ်ဆေးခဲ့ပြီးနောက် ပထုံဌာနီခရိုင်၊ ခလောင်လွမ်မြို့နယ်အတွင်းရှိ နေအိမ်တလုံးမှာ အသက်နှစ်ဆယ့်နှစ်နှစ်အရွယ် မြန်မာအမျိုးသားနှစ်ဦးနဲ့ အသက်နှစ်ဆယ့်လေးနှစ်အရွယ် မြန်မာအမျိုးသမီးတဦးတို့ကို ဖမ်းဆီးရမိခဲ့တာပါ။
တရားခံတွေဆီကနေ ပြစ်မှုကျူးလွန်ရာမှာ အသုံးပြုခဲ့တဲ့ နံပါတ်ပြားမပါတဲ့ ဆိုင်ကယ်တစီး၊ သေနတ်တလက်နဲ့ ကျည်ဆန်တွေအပြင် လုယက်ခံရတဲ့ဖုန်းတို့ကိုလည်း သိမ်းဆည်းရမိခဲ့တယ်လို့ ရဲတပ်ဖွဲ့က ထုတ်ပြန်ထားပါတယ်။
ဖမ်းဆီးခံရသူတွေဟာ ခုလိုလုယက်မှုတွေကို အကြိမ်ကြိမ်ကျူးလွန်ခဲ့သူတွေနဲ့ဆက်စပ်နေပြီး ဥပဒေအရ အမြန်ဆုံး အရေးယူသွားဖို့ ဆက်လက်ဆောင်ရွက်နေပါတယ်။













