Border News Agency
ပေါက်တော၊ စက်တင်ဘာ ၂၅။
အာရက္ခတပ်တော်ထိန်းချုပ်ထားတဲ့ ပေါက်တောမြို့နယ်ကပင်လယ်ပြင်မှာ ငါးဖမ်းနေတဲ့မွတ်ဆလင်အမျိုးသားဆယ့်လေးဦးကို စစ်ကော်မရှင်တပ်ဖမ်ဆီးထောင်ချလိုက်တယ်လို့ ပေါက်တောဒေသခံတွေက ဆိုကြပါတယ်။
သူတို့ဟာ ပေါက်တောမြို့နယ်၊ ဆင်တက်မော်ကျေးရွာက အသက်ဆယ့်သုံးနှစ်မှအသက်ငါးဆယ်ကျော်အရွယ် မွတ်ဆလင်အမျိုးသားဆယ့်လေးဦးဖြစ်ကြပါတယ်။
သူတို့တွေဟာ စက်တင်ဘာ ၁၆ ရက်နေ့က ပင်လယ်ပြင်ထဲငါးဖမ်းစက်လှေနဲ့ ငါးဖမ်းနေတာကို စစ်ကော်မရှင်ရေတပ်ကအမြန်ရေယာဥ်နဲ့လာရောက်ဖမ်းဆီးသွားပြီးတဲ့နောက် စစ်တွေခရိုင်တရားရုံးကတဦးစီကို ထောင်ဒဏ်နှစ်နှစ်ခွဲစီချမှတ်လိုက်တာလို့ ဆိုကြပါတယ်။
သူတို့ထောင်ဒဏ်ချမှတ်ခံထားရတာတပတ်ကျော်ရှိနေပေမယ့် အဆက်အသွယ်လုံးဝမရရှိတဲ့အတွက် မိသားစုဝင်တွေ စိုးရိမ်စိတ်ပူနေကြတယ်လို့ ဆိုကြပါတယ်။
“ဖမ်းပြီး ထောင်ချထားတယ်လို့တော့ သတင်းတွေကြားရတယ်။ အဆက်အသွယ်လည်းမရဘူး။ မိသားစုတွေကတော့ စိုးရိမ်နေကြတာပေါ့။ လူငယ်လူရွယ်တွေလည်းပါသွားတော့ ပိုပြီးစိတ်ပူနေကြတယ်။ ခွင့်မရဘဲငါးဖမ်းလို့ ထောင်ချတာလို့လည်း သတင်းတွေကြားရတယ်။”လို့ ပေါက်တောဒေသခံတဦးက Border News Agency ကိုပြောပါတယ်။
သူတို့တွေကိုဖမ်းဆီးပြီး ထောင်ဒဏ်နှစ်နှစ်ခွဲချမှတ်ထားတာဟာ ခွင့်ပြုချက်မရှိဘဲ ပင်လယ်ပြင်မှာငါးဖမ်းနေတာတွေကြောင့်ဖြစ်တယ်လို့ နီးစပ်သူတွေက ဆိုကြပါတယ်။
အဲဒီအပြင် ပင်လယ်ပြင်မှာငါးဖမ်းနေတဲ့ ပေါက်တောမြို့နယ်၊ ချောင်းဝနဲ့ကုန်တန်ကျေးရွာက ဒေသခံရခိုင်အမျိုးသားခုနှစ်ဦးကိုလည်း စစ်ကော်မရှင်ရေတပ်က ဖမ်းဆီးသွားခဲ့ပါတယ်။
အာရက္ခအဆုံးအဖြတ်စစ်ပွဲစတင်ကတည်းက စစ်ကော်မရှင်တပ်က ကုန်လမ်း၊ ရေလမ်းတွေအပြင် ပင်လယ်ပြင်မှာငါးဖမ်းခွင့်တွေကိုလည်း တားမြစ်ကန့်သတ်ထားတာပါတယ်။
စစ်တွေမြို့အခြေစိုက်စစ်ကော်မရှင်ရေတပ်သင်္ဘောတွေဟာ စစ်တွေနဲ့ပေါက်တောပင်လယ်ပြင်မှာ လှုပ်ရှားသွားလာနေပြီး ဒေသခံငါးဖမ်းသမားတွေကို ဖမ်းဆီးတာတွေမကြာခဏပြုလုပ်နေတယ်လို့ ပြည်သူတွေက ဆိုကြပါတယ်။
အဲဒါကြောင့် ရေလုပ်ငန်းလုပ်နဲ့အသက်မွေးဝမ်းကျောင်းပြုနေကြရတဲ့ ပေါက်တောဒေသခံအများစုဟာ စားဝတ်နေရေးကြောင့်ငါးဖမ်းထွက်ကြတိုင်းစစ်ကော်မရှင်တပ်ဖမ်းဆီးတာတွေကို ခံနေကြရတယ်လို့ ဆိုကြပါတယ်။
ဒါပေမယ့် ငါးဖမ်းမထွက်ရင်လည်းစားဝတ်နေရေးမပြေလည်ကြတာမို့ ဖမ်းဆီးခံကြရတာကိုသိနေကြပေမယ့် အသက်စွန့်ငါးဖမ်းထွက်ဝမ်းစာရှာဖွေနေကြရတယ်လို့ ပြည်သူတွေက ဆိုကြပါတ ယ်။
စစ်ကော်မရှင်ရေတပ်စစ်ရေယာဥ်တွေဟာ ပင်လယ်ပြင်မှာငါးဖမ်းနေတဲ့ပေါက်တောမြို့နယ်၊ တန်းတင်ကျေးရွာနဲ့ငရုပ်ချောင်းရွာက ဒေသခံငါးဖမ်းသမားခြောက်ဦးကို စက်တင်ဘာလ ၈ ရက်နေ့ကဖမ်းဆီးသွားတယ်လို့ ဆိုကြပါတယ် ။
အဲဒီအပြင် ပေါက်တောမြို့နယ်၊ မြေငူကျွန်းအနီးမှာငါးဖမ်းနေတဲ့ ပေါက်တောဒေသခံငါးဖမ်းသမားနှစ်ဆယ်သုံးဦးကိုလည်း ပြီးခဲ့တဲ့ဧပြီလ ၅ ရက်နေ့ကစစ်ကော်မရှင်တပ်ဖမ်းဆီးသွားခဲ့ပါတယ်။
စစ်ကော်မရှင်ရေတပ်ဟာ စစ်သည်လက်နက်ရေတပ်စစ်သင်္ဘောတွေဖြည့်တင်းပြီး စစ်တွေ၊ ပေါက်တောအပါအဝင်ရေပြင်နေရာတွေမှာကင်းလှည့်တာတွေပြုလုပ်နေကြပါတယ်။
အဲဒီရေတပ်စစ်သင်္ဘောတွေဟာ ဒေသခံပြည်သူတွေ၊ ငါးဖမ်းသမားတွေကို ပစ်ခတ်တာတွေ၊ မတရားဖမ်းဆီးတာတွေမကြာခဏကျူးလွန်နေကြတယ်လို့ ပြည်သူတွေက ဆိုကြပါတယ်။
