Border News Agency
သိန္နီ၊ စက်တင်ဘာ ၂၇။
အမျိုးသားဒီမိုကရက်တစ်မဟာမိတ်တပ်မတော် (MNDAA)ထိန်းချုပ်နယ်မြေအတွင်းအထူးဒေသ ၁ သိန္နီခရိုင်မှာ လူသတ်ဓားပြတိုက်ကျူးလွန်သူသုံးဦးကို သေဒဏ်ပေးခဲ့တယ်လို့ စက်တင်ဘာလ ၂၆ ရက်၊ မနေ့ထုတ်ပြန်ပါတယ်။
ရှမ်းပြည်နယ်မြောက်ပိုင်း၊ သိန္နီခရိုင်အတွင်းမှာပြန်ပေးဆွဲမှု၊ လူသတ်မှု၊ ဓားပြမှုတွေနဲ့တရားစွဲခံထားရသူခုနှစ်ဦးကို စီရင်ချက်ချခဲ့ပြီးသုံးဦးကို သေဒဏ်ချခဲ့ပါတယ်။
လူသတ်မှု၊ ဓားပြတိုက်လူသတ်မှု ကျူးလွန်သူတွေကို သေဒဏ်ချခဲ့တာဖြစ်ပြီးအဲဒီထဲမှာ MNDAA တပ်သားတဦးနဲ့ ကျေးရွာအုပ်ချုပ်ရေးကော်မတီဝင်တဦးလည်းပါဝင်နေပါတယ်။
အဲဒီလူသတ်မှုကျူးလွန်တဲ့ ကျော်နိုင်လတ်ဟာမကွေးတိုင်းဇာတိဖြစ်ပြီး သိန္နီခရိုင်မှာဆောက်လုပ်ရေးလာလုပ်တဲ့တူဖြစ်သူနဲ့ဖိနပ်လုရင်း လူသတ်မှုကျူးလွန်တာကြောင့် သေဒဏ်ချမှတ်တာဖြစ်တယ်လို့ဆိုပါတယ်။
အဲဒီအပြင် ကိုးကန့်တပ်ရဲ့ ကျေးရွာအုပ်ချုပ်ရေးကော်မတီဝင် လီကြည်ဖူဟာအိမ်ထောင်ရှိအမျိုးသမီးနဲ့ချစ်သူဖြစ်ပြီး အဲဒီအမျိုးသမီးကလမ်းခွဲမယ်ပြောတာကြောင့်လူသတ်မှုဖြစ်ပွားခဲ့တာလို့ ဆိုပါတယ်။
နောက်ပြီးကိုးကန့်တပ်ရဲ့တပ်ဖွဲ့ဝင်ရန်ရှင်းဖားဟာလည်း ကုန်တင်ကားတစီးကိုဓားပြတိုက်ကာ လူသတ်မှုကျူးလွန်တာကြောင့် သေဒဏ်ပေးခဲ့တယ်လို့ဆိုပါတယ်။
အထူးဒေသတရားစီရင်ရေးဌာနဆိုင်ရာတွေဟာအချက်အလက်ကိုအခြေခံပြီး ဥပဒေကိုစံထားကာ ပြစ်မှုဆိုင်ရာမှုခင်းအားလုံးကိုအပြင်းထန်ဆုံးနှိမ်နင်းမှုနဲ့ ဆက်လက်ထိန်းသိမ်းထားနိုင်တယ်လို့ဆိုပါတယ်။
အထူးသဖြင့် ပြစ်မှုကြီးတွေနဲ့ကြီးမားတဲ့မှုခင်းတွေအတွက် ဥပဒေနဲ့အညီ ပြင်းထန်စွာအရေးယူဆောင်ရွက်ဖို့ခိုင်ခိုင်မာမာဖြတ်ထားကာ လုံးဝခွင့်လွတ်ပေးမှာမဟုတ်ဘူးလို့ဆိုပါတယ်။
အများပြည်သူရှေ့မှောက်မှာ တရားစစ်ဆေးစီရင်တာဟာ ပြစ်မှုကျူးလွန်တာကို ဥပဒေနဲ့အညီအရေးယူတာဖြစ်သလို ပြည်သူတရပ်လုံးအတွက် တရားဥပဒေစိုးမိုးရေး သတိပေးချက်လည်းဖြစ်တယ်လို့ဆိုပါတယ်။
ဘယ်သူမဆို ဥပဒေကိုစမ်းသပ်ကျူးလွန်သူဟာ နောက်ဆုံးမှာပြင်းပြင်းထန်ထန်အရေးယူခံရမှာဖြစ်ပြီး လူမှုအသိုင်းအဝိုင်းရဲ့လုံခြုံရေးကို ခြိမ်းခြောက်တဲ့ ယ်လုပ်ရပ်တွေကိုမဆိုလေးလေးနက်နက် နှိမ်နင်းခံရမယ်လို့လည်းဆိုပါတယ်။
