Border News Agency
ပခုက္ကူ၊ဇွန် ၁၀။
ပခုက္ကူခရိုင်၊မြစ်ခြေမြို့ရှိ အာဏာသိမ်းစစ်တပ်ရဲ့ ရဲစခန်းကို ပြည်သူ့ကာကွယ်ရေးတပ်မတော် (PDF) က ဇွန်လ ၁၀ ရက်၊ ဒီနေ့မနက်ပိုင်းမှာသိမ်းပိုက်ခဲ့တယ်လို့ ပခုက္ကူခရိုင်စစ်ဌာနက ထုတ်ပြန်ပါတယ်။
အဲဒီစခန်းကအာဏာသိမ်းစစ်တပ် တပ်ဖွဲ့ဝင်တွေဟာ မေလအတွင်းက ဒေသခံပြည်သူ ၂၄ ဦးကိုသတ်ဖြတ်ပြီး လူနေအိမ် ၁,၀၀၀ ကျော်ကို မီးရှို့ဖျက်ဆီးခဲ့တဲ့ သူတို့ကိုလက်တုံ့ပြန်တဲ့အနေနဲ့ တိုက်ခိုက်ခဲ့တာလို့ ဆိုပါတယ်။
အဲဒီစခန်းကို ဇွန်လ ၁၀ ရက်၊မနက် ၄ နာရီမှာ စတင်တိုက်ခိုက်ခဲ့ပြီး ၅ နာရီမှာ စခန်းကို အပြီးသတ် သိမ်းပိုက်နိုင်ခဲ့တာလို့ဆိုပါတယ်။
တိုက်ပွဲအတွင်း အာဏာသိမ်းစစ်တပ် တပ်ဖွဲ့ဝင် ၂ ဦးသေဆုံးပြီး ၁၄ဦးကို စစ်သုံ့ပန်းအဖြစ် ဖမ်းဆီးရမိခဲ့တယ်လို့ ဆိုပါတယ်။
အဲဒီအပြင် G-3 သေနတ် ၁၈ လက်၊ ၆၀ မမ စိန်ပြောင်း ၁လက်နဲ့ ကျည်ဆံပေါင်း ၁,၉၀၀ ကျော်ကိုသိမ်းဆည်းရမိခဲ့တယ်လို့ဆိုပါတယ်။
အဲဒီဖမ်းဆီးရမိတဲ့ စစ်သုံ့ပန်းတွေကိုတော့ နိုင်ငံတကာစစ်ဥပဒေနဲ့အညီ ထိန်းသိမ်းထားပြီး စစ်ရာဇဝတ်မှု ကျူးလွန်သူတွေကို စစ်တရားရုံးတင် အရေးယူသွားမယ်လို့လည်း ဆိုပါတယ်။
အဲဒီတိုက်ပွဲမှာ PDF ရဲဘော် ၁ဦး မြင့်မြတ်စွာ အသက်ပေးလှူခဲ့ပြီး ၁ ဦးဒဏ်ရာ ရရှိခဲ့တယ်လို့ဆိုပါတယ်။
အာဏာသိမ်းစစ်တပ်ကို အပြီးတိုင် ချေမှုန်းနိုင်တဲ့အထိ ဆက်လက်တိုက်ပွဲဝင်သွားမယ်လို့ လည်းဆိုပါတယ်။
