Border News Agency
သံတွဲ၊ စက်တင်ဘာ ၂၉။
စစ်ကော်မရှင်တပ်ရဲ့ လေကြောင်း၊ ရေကြောင်း၊ လက်နက်ကြီးရန်တွေကို အာရက္ခပြည်သူလူထုပိုမိုသတိထားကြဖို့ စက်တင်ဘာလ ၂၉ ရက်၊ ဒီနေ့ အာရက္ခတပ်တော်ထုတ်ပြန်တိုက်တွန်းထားပါတယ်။
အာရက္ခဒေသအတွင်းတိုက်ပွဲတွေအပါအဝင် အာရက္ခဒေသအစပ်သုံးနေရာတိုက်ပွဲတွေမှာ စစ်ကော်မရှင်တပ်ဖွဲ့ဝင်တွေ ထိခိုက်ကျဆုံးမှုများနေပြီး တပ်ပျက်နေတယ်လို့အာရက္ခတပ်တော်က ဆိုပါတယ်။
အဲဒီအပြင် စစ်ကော်မရှင်တပ်ရဲ့ အတင်းအဓမ္မစုဆောင်းတာခံရတဲ့တပ်ဖွဲ့ဝင်တွေမှာ တိုက်ခိုက်လိုစိတ်မရှိဘဲ ရှေ့တန်း၊ နောက်တန်းတွေမှာ အခွင့်ရရင်ရသလိုတပ်ပြေးတာတွေ၊ ဘက်ပြောင်းတာ၊ အလံဖြူထောင်အလင်းဝင်လာတာတွေ နေ့စဥ်ရှိနေတယ်လို့လည်း အာရက္ခတပ်တော်ကဆိုပါတယ်။
နောက်ပြီး အာရက္ခတပ်တော်ထိန်းချုပ်မြို့၊ ရွာတွေရှိ စာသင်ကျောင်း၊ ဈေး၊ ဆေးရုံ၊ ဆေးခန်းနဲ့ဘုန်းကြီးကျောင်းစတဲ့နေရာတွေ၊ လူစုလူဝေးရှိတဲ့နေရာတွေကို နေ့၊ ညအချိန်မရွေး လေကြောင်း၊ ရေကြောင်းနဲ့လက်နက်ကြီးပစ်ခတ်တိုက်ခိုက်တာတွေ ပိုပြီးလုပ်နေတယ်လို့ အာရက္ခတပ်တော်ကဆိုပါတယ်။
အဲဒါကြောင့် အာရက္ခပြည်သူတွေအနေနဲ့ စစ်ကော်မရှင်တပ်ရဲ့လေကြောင်း၊ ရေကြောင်း၊ လက်နက်ကြီးရန်ကို အရင်ကထက်ပိုပြီးသတိထားကြဖို့နဲ့ စစ်ရေးသတိအပြည့်အဝအချိန်မရွေးရှိကြဖို့ ထပ်ပြီးအသိပေးတိုက်တွန်းထားပါတယ်။
အာရက္ခတပ်တော်ထိန်းချုပ်ထားတဲ့မြို့နယ်တွေကို စစ်ကော်မရှင်တပ်တိုက်ခိုက်မှုကြောင့် သုံးရက်အတွင်းအမျိုးသမီးတွေအပါအဝင် သုံးဦးသေဆုံးပြီး နှစ်ဆယ့်ခြောက်ဦးထိဒဏ်ရာရရှိခဲ့ပါတယ်။
အာရက္ခတပ်တော်ထိန်းချုပ်ထားတဲ့ ပလက်ဝမြို့ကို စက်တင်ဘာလ ၂၉ ရက်၊ ဒီနေ့ စစ်ကော်မရှင်တပ်လေကြောင်းတိုက်ခိုက်လို့ အမျိုးသမီးနှစ်ဦးသေဆုံးပြီး တဆယ့်ကိုးဦးဒဏ်ရာရရှိသွားပါတယ်။
အာရက္ခတပ်တော်ထိန်းချုပ်ထားတဲ့ ရသေ့တောင်မြို့နယ်ကို စက်တင်ဘာ လ ၂၉ ရက်၊ ဒီနေ့မနက်က စစ်တွေအခြေစိုက်စစ်ကော်မရှင်တပ်က လက်နက်ကြီးပစ်ခတ်လို့ အရပ်သားတဦးသေဆုံးပြီး နှစ်ဦးဒဏ်ရာရသွားပါတယ်။
စစ်ကော်မရှင်တပ်ဟာ စက်တင်ဘာလ ၂၈ ရက်၊ မနေ့က သံတွဲနဲ့ဂွဆက်သွယ်ထားတဲ့လမ်းပိုင်းရှိ ပဒဲကောကျေးရွာအနီးကို လေကြောင်းတိုက်ခိုက်ခဲ့သလို သံတွဲမြို့အနီးပင်လယ်ပြင်ရှိရေတပ်စစ်သင်္ဘောကြီးတွေကလည်း လက်နက်ကြီးပစ်ခတ်တိုက်ခိုက်ခဲ့ပါတယ်။
သံတွဲမြို့ကို စက်တင်ဘာလ ၂၇ ရက်နေ့ညကလည်း စစ်ကော်မရှင်တပ်လေကြောင်းတိုက်ခိုက်လို့ အရပ်သားတဦးသေဆုံးပြီး ခြောက်ဦးဒဏ်ရာရခဲ့ပါတယ်။
အဲဒီအပြင် တောင်ကုတ်မြို့၊ ကံပိုင်ရပ်ကွက်ရှိ တပ်ဦးဘုန်းကြီးကျောင်းကို စက်တင်ဘာလ ၂၆ ရက်နေ့ကလည်း စစ်ကော်မရှင်တပ်လေကြောင်းတိုက်ခိုက်လို့ ကျောင်းဆောင်ပျက်စီးသွားခဲ့ပါတယ်။
အာရက္ခတပ်တော်ထိန်းချုပ်နယ်မြေတွေကို စစ်ကော်မရှင်တပ်လေကြောင်းတိုက်ခိုက်တာတွေ နေ့စဥ်ရက်ဆက်ပြုလုပ်နေတာမို့ အရပ်သားပြည်သူတွေ သေဆုံးဒဏ်ရာရနေကြရပါတယ်။
