Border News Agency
သီပေါ၊ အောက်တိုဘာလ ၃။
သီပေါမြို့နယ်ကို စစ်ကော်မရှင်လေကြောင်းမှ ပေါင်၅၀၀ဗုံးနှစ်လုံးနဲ့ တိုက်ခိုက်ခဲ့တာကြောင့် အဆောက်အဦးတခု ပျက်စီးသွားခဲ့တယ်လို့ တအာင်းတပ်မတော်ကအောက်တိုဘာလ ၃ ရက်၊ဒီနေ့ထုတ်ပြန်ပါတယ်။
စစ်ကော်မရှင်တပ်ဟာ သီပေါမြို့နယ်၊ စံဖိတ်ကျေးရွာ၊ ကုမုဒြာဟိုတယ်ကို အောက်တိုဘာလ ၂ ရက်၊မနေ့ည ၁၀ နာရီ ၁၅ မိနစ်အချိန်က ပြည်သူတွေနေတဲ့နေရာကို ရည်ရွယ်ချက်ရှိရှိလေကြောင်းတိုက်ခိုက်ခဲ့တာကြောင့် ကုမုဒြာဟိုတယ်ပျက်စီးသွားခဲ့တယ်လို့ ဆိုပါတယ်။
သီပေါမြို့နယ်၊ဘော်ကြိုကျေးရွာကို စက်တင်ဘာလ ၃ ရက်နေ့က လေကြောင်းတိုက်ခိုက်ခဲ့တာကြောင့် အရပ်သားတဦးဒဏ်ရာရခဲ့သလို နေအိမ်သုံးလုံးပျက်စီးသွားခဲ့တယ်လို့ ဆိုပါတယ်။
နမ္မတူမြို့ကိုလည်း စက်တင်ဘာလ ၂ ရက်၊နေ့လည်က လေကြောင်းမှ ပေါင် ၅၀၀ဗုံးနဲ့တိုက်ခိုက်ခဲ့တာကြောင့်အမျိုးသားတဦးနဲ့အမျိုးသမီးသုံးဦးသေဆုံးသွားခဲ့သလို ကလေးငယ်တဦး၊အမျိုးသားနှစ်ဦးနဲ့အမျိုးသမီးနှစ်ဦးဒဏ်ရာရသွားတယ်လို့ဆိုပါတယ်။
အဲဒါကြောင့် ဒေသခံတွေအနေနဲ့ စစ်ကော်မရှင်တပ်ရဲ့လေကြာင်းအပြင် ဒရုန်းနဲ့ ဗုံးကြဲတိုက်ခိုက်မှုတွေဆက်လက်ပြုလုပ်နိုင်လို့ စစ်ရေးအမြဲသတိရှိဖို့နဲ့ လေကြောင်းရန်ကာကွယ်ရေးဆိုင်ရာ နည်းလမ်းတွေကို လိုက်နာဖို့လိုအပ်တယ်လို့လည်း ဆိုကြပါတယ်။
စစ်ကော်မရှင်တပ်ဟာ တအာင်းပြည်အတွင်းသာမက တိုင်းရင်းသားလက်နက်ကိုင်တွေ၊ ပြည်သူ့ကာကွယ်ရေးတပ်ဖွဲ့တွေကသိမ်းပိုက်ရရှိထားတဲ့နေရာတွေကို၊ လေကြောင်း၊ လက်နက်ကြီး၊ ဒရုန်းတွေနဲ့ အပြစ်မဲ့ပြည်သူတွေအပေါ်စစ်ရာဇဝတ်မှုတွေကျူးလွန်နေတယ်လို့ဆိုပါတယ်။
